ހުޅުމާލޭގައި ހަމަނުޖެހުން ހިންގި ބިދޭސީންގެ ބަންދަށް 15 ދުވަސް
އައިލެންޑް އެކްސްޕާޓުން މުސާރަ ނުދީގެން، ހުޅުމާލޭގައި ބިދޭސީންތަކެއް ހިންގި ބޮޑު ހަމަނުޖެހުންތަކާ ގުޅިގެން ހައްޔަރު ކުރި 41 ބިދޭސީއެއްގެ ބަންދުގެ މުއްދަތު މިއަދު އިތުރުކޮށްފި އެވެ.
ބަންގްލަދޭޝް މި މީހުން މުޒާހަރާ ކޮށްފައިވަނީ މުސާރަ ނުލިބޭ ކަމަށް ބުނެ އެވެ. މުޒާހަރާ ކޮންޓްރޯލް ކުރަން ވަރަށް މަދު ފުލުހުންތަކެއް އުޅުނު އިރު އެމީހުން ވަނީ ފުލުހުންނަށް ޖިސްމާނީ އަނިޔާ ލިބޭ ފަދަ ގޮތަކަށް ކުރިމަތިލާފަ އެވެ. ބައެއް ފުލުހުންނަށް އަނިޔާވުމުގެ އިތުރުން ވެހިކަލަށް ގެއްލުންވެފައިވެސް ވެއެވެ.
ފުލުހުންގެ މީޑިއާ އޮފިޝަލާ ހަވާލާދީ "މިހާރު" ނޫހުން ރިޕޯޓުކޮށްފައިވާ ގޮތުގައި އެ ހުރިހާ ބިދޭސީން ވެސް 15 ދުވަހަށް ޖަލުގައި ބަންދުކޮށްގެން ތަހުގީގު ކުރިއަށް ގެންދިއުމަށް ކޯޓުން މިއަދު އަންގައިފައިވާ ކަމަށެވެ.
ފުލުހުން ބުނެފައިވަނީ މާލޭގެ މަގުތަކުގެ އަމާންކަން ނަގާލައި ދައުލަތާއި ރައްޔިތުންގެ މުދަލަށް ގެއްލުން ދިނުން ހަރުކަށި އިބާރާތުން ކުށްވެރިކުރާ ކަމަށެވެ. އަދި، އެ އަމަލު ހިންގުމުގައި ބައިވެރިވި މީހުންނާމެދު ގާނޫނުތަކާއި ގަވައިދުތަކުގެ ތެރެއިން އެޅެން އޮތް އެންމެ ހަރުކަށި ފިޔަވަޅެއް އެޅުމަށް މަސައްކަތް ކުރަމުންދާ ކަމަށެވެ.
