ރީ-ރަޖިސްޓްރީ ވުމަށް 26،000 އަށް ވުރެ ގިނަ މީހުން އެދިއްޖެ
ކުރިއަށް އޮތް ލޯކަލް ކައުންސިލް އިންތިހާބުގައި ރަށްވެހި ވެފައިވާ ތަން ނޫން އެހެން ތަނެއްގައި ވޯޓުލުމަށް އެދި 26،000 އަށް ވުރެ ގިނަ މީހުން ހުށަހަޅައިފިއެވެ.
ވޯޓުލާން ރަޖިސްޓަރީވެފައިވާ ތަން ނޫން އެހެން ތަނެއްގައި ވޯޓުލުމަށްޓަކައި ރަޖިސްޓަރީވުމުގެ ފުރުޞަތު ހުޅުވާލާފައިވަނީ މާޗު 2 ވަނަ ދުވަހުއެވެ.
މި ފުރުސަތު އިއްޔެގެ ނިޔަލަށް ހަމަވެފައިވާއިރު 26750 މީހުން ފޯމު ހުށަހަޅާފައިވާ ކަމަށް އިލެކްޝަން ކަމިޝަންގެ ރައީސް އަހުމަދު ޝަރީފު ވަނީ ވިދާޅުވެފައެވެ.
މިއީ ކޮވިޑު-19 އާ ގުޅިގެން ފަސްކުރެވުނު އިންތިހާބުގައި ރީރަޖިސްޓްރީވީ އަދަދަށް ވުރެ އިތުރު އަދަދެއްކަމަށް ވެސް ޝަރީފް ވިދާޅުވިއެވެ.
އަދި ރީރެޖިސްޓްރޭޝަން އަށް އިތުރު ފުރުސަތެއް ހުޅުވާނުލެވޭނެ ކަން ފާހަގަ ކުރައްވައި ޝަރީފު ވިދާޅުވީ ރީ-ރަޖިސްޓްރީ ވުމަށް އިތުރު ފުރުސަތު ދީފިނަމަ އިންތިހާބު ބާއްވަން ކަނޑައެޅިފައިވާ ތާރީހުގައި ބޭއްވުމަށް ހުރަސްތަކެއް ކުރިމަތިވާނެ ކަމަށެވެ.
މިހާރު ވޯޓުލުމަށް ރަޖިސްޓަރީވެފައިވާ ތަނުގެ މަޢުލޫމާތު ކޮމިޝަނުގެ ވެބްސައިޓް (www.elections.gov.mv) އިން ޗެކް ކުރެވޭނެއެވެ. އަދި އެސް.އެމް.އެސް ((VR space IDNO Send to 1414 ކޮށްގެން ވެސް ޗެކް ކުރެވޭނެއެވެ.
އަންނަ އޭޕްރީލް މަހުގެ 10 ވަނަ ދުވަހު ބާއްވަން ނިންމާފައިވާ އިންތިހާބުގައި، ވޯޓްދެވޭ 272,480 މީހުންގެ ތެރޭގައި ހިމެނެނީ އަތޮޅުތަކުގެ ރައްޔިތުންގެ ތެރެއިން 220،981 މީހަކާއި މާލެ ސިޓީއަށް ނިސްބަތްވާ 51،499 މީހެކެވެ.
