ހިތާމަވެރި ޚަބަރެއް! ބަނޑުގައި އޮންނަ ތުއްތު ދަރިފުޅަށް ވެސް ކޮވިޑް ޖެހިދާނެކަމަށް ސައިންސްވެރިން ބުނެފި!
މީގެކުރިން ސިއްޙީ މާހިރުން ބުނަމުން އައީ މާބަނޑު އަންހެނަކަށް ކޮވިޑް-19 ޖެހުން ކަމުގައިވިޔަސް، އޭނާގެ ބަނޑުގައި އޮންނަ ތުއްތު ދަރިފުޅަށް ބަލީގެ އަސަރު ނުކުރާނެ ކަމަށެވެ.
ނަމަވެސް ޓެކްސަސްގެ މިތުއްތު އަންހެން ކުއްޖާ އުފަންވީއިރު ވެސް ހުރީ ކޮވިޑަށް ފައްސިވެފައެވެ. އެކުއްޖާ ދުނިޔެއަށް އައުމުގެ ކުރިން ކުއްޖާގެ މަންމަ މިބައްޔަށް ފައްސިވެފައިވާ ކަމަށާއި ދިޔައީ ފަރުވާ ކުރަމުން ކަމަށް ރިޕޯޓުތަކުން ބުނެފައިވެއެވެ.
މިދިޔަ ހަފްތާގައި އުފަންވި އެކުއްޖާ، އުފަންވީއިރު ވެސް ނޭވާލާން ދަތިވެ، ހުރީ ހުން ވެސް އައިސްފައެވެ. އެހެންކަމުން ވަގުތުން އެކުއްޖާ އައިސީޔޫ އަށް ގެންދިޔައެވެ. އަދި ކޮވިޑަށް ވެސް ޓެސްޓު ކުރިއެވެ.
އޭގެ 24 ގަޑިއިރު ފަހުން ނަތީޖާ ލިބުނުއިރު އޭގެން ދެއްކީ ތުއްތުކުއްޖާ އެބައްޔަށް ފައްސި ކަމަށެވެ.
އެކަމާއި ސިއްޙީ މާހިރުން ވެސް ހައިރާންވެގެން، އެކުއްޖާގެ މަސް (ޕްލެސެންޓާ) ގެ ވެސް ތަހުލީލުތަކެއް ހެދިއެވެ. ނަތީޖާއިން ދެއްކީ މަހުގައި ކޮރޯނާ ވައިރަސް ހުރި ކަމަށެވެ.
މިކަމުން ހާމަވީ ތުއްތުކުއްޖާއަށް ކޮރޯނާ ވައިރަސް ޖެހިފައިވަނީ މައިމީހާގެ ބަނޑުތެރޭގައި އޮއްވާކަމެވެ.
