އެމްޑީޕީން ޖަލްސާ ބޭއްވީ އެޗްޕީއޭގެ ހުއްދައާއެކު
ކުރިއަށް އޮތް ލޯކަލް ކައުންސިލް އިންތިހާބުގައި އެމްޑީޕީގެ ޓިކެޓްގައި ހުޅުމާލެ ދާއިރާއަށް ކުރިމަތިލާ ކެންޑިޑޭޓްގެ ކެންޕެއިން ޖަގަހަ ހުޅުވުމުގެ ޖަލްސާ ބޭއްވީ ހެލްތް ޕްރޮޓެކްޝަން އެޖެންސީ (އެޗްޕީއޭ) ގެ ހުއްދަ ލިބިގެން ކަމަށް ހުޅުމާލެ ދާއިރާގެ އެމްޑީޕީގެ މެންބަރު އަލީ ނިޔާޒު ވިދާޅުވެއްޖެއެވެ.
އެމްޑީޕީގެ ރައީސް، މަޖިލީހުގެ ރައީސް މުޙައްމަދު ނަޝީދު ވެސް ބައިވެރިވެ ވަޑައިގެންނެވި ޖަލްސާ ކުރިޔަށް ގެންގޮސްފައި ވަނީ އެޗްޕީއޭގެ ގައިޑްލައިންތަކާ ޚިލާފަށް ކަަމަށް މީސްމީޑިއާގައި ގިނަ ބަޔަކު ދިޔައީ ބުނަމުންނެވެ. މިކަމަށް ރައްދު ދެއްވާ ނިޔާޒް ވިދާޅުވީ، މިއަދު ހުޅުމާލޭގައި ބޭއްވި ޖަގަހަ ހުޅުވުމުގެ އިވެންޓަށް އެޗްޕީއޭއިން ހުއްދަ ދީފައިވާ ކަމަށެވެ. އަދި އެކަމަށް ހުއްދަ ދިން ލިޔުން ނިޔާޒް ވަނީ ޓްވީޓް ކުރައްވާފައެވެ.
އެމްޑީޕީއިން މިއަދު ޖަގަހަ ހުޅުވުމުގެ ޖަލްސާއެއް ކުރިޔަށް ގެންގޮސްފައިވާއިރު, އިދިކޮޅު ފަރާތްތަކުން މިއަދު މާލޭގައި ކުރިޔަށް ގެންދިޔަ ޖަލްސާއަށް ފުލުހުން ވަނީ ހުރަސް އަޅާފައެވެ. މިގޮތުން އިދިކޮޅުގެ އެއްވުމުގެ ތެރެއިން 24 މީހަކު ހައްޔަރު ކޮށްފައި ވެއެވެ. އިދިކޮޅުން އެއްވުން ކުރިޔަށް ގެންދިޔަ ނުދީ، އެމްޑީޕީގެ އެއްވުން ކުރިޔަށް ގެންދަން އެޗްޕީއޭއިން ހުއްދަދީފައި ވަނީ ކީއްވެގެންތޯ ގިނަ ބަޔަކު ދަނީ ސުވާލު އުފައްދަމުންނެވެ.
އެޗްޕީއޭއިން އާއްމު ކޮށްފައިވާ އުސޫލުގައި ބުނެފައިވާ ގޮތުން 5 މީހުންނަށްވުރެ ގިނަ މީހުން މަގުމަތީގައި އެއްވެ އުޅުމަކީ މަނާކަމެކެވެ. އަދި އިންތިޚާބީ ކެންޕެއިން ކުރުމަށް ޖަލްސާ މޮނިޓަރިންގެ ހާލަތުގައި އޮންނަ ރަށްރަށުގައި ނުބޭއްވޭނެއެވެ.
