ރޭގަނޑުގެ ނުނިދުމާ، އަބަދު ކާހިތްވުމާ ގުޅުމެއްވޭ؟
އަބަދު ކާހިތްވުމަކީ ގިނަ މީހުނަށް ވަރަށް ދިމާވާ ކަމެކެވެ. މާ ގަދަޔަށް ކާ ހިތްވުމަކީ އެކަމުގެ ސަބަބުން ސިއްހަތަށް ވެސް ގެއްލުން ވާ ކަމެކެވެ. އަދި ބަރުދަން ލުއި ކުރުމަށް ވެސް އޮތް ބޮޑު ހުރަހެކެވެ. ނަމަވެސް ނޭނގެނީ މިކަން ހުއްޓުވާނެ ގޮތެކެވެ. އަބަދު ކާ ހިތްވާ ސަބަބެވެ.
މާ ގިނައިން ކާ ހިތް ވުމަކީ ރޭގަނޑު ހަމައަށް ނުނިދުމުގެ ސަބަބުން ދިމާވާ ކަމެއް ކަމުގައި މީހަކު ބުނުމުން ގިނަ ބަޔަަކަށް ހިނި އާދެއެވެ. އަދި ކެއުމާ ނިިދުމާ އޮތީ ކޮން ގުޅުމެއްތޯ ސުވާލު އުފައްދައެވެ. ނަމަވެސް މިއީ ހަގީގަތެކެވެ. ރޭގަނޑު ނިދަން ޖެހޭ މިންވަރަށް ނުނިދުމަކީ އޭގެ ސަބަބުން އަބަދު ކާހިތްވުމަށް މެދުވެރިކުރުވާ ސަބަބެއް ކަމުގައި ސައިންސްވެރިން ދެކެއެވެ.
ސައިންސްވެރިން ބުނާ ގޮތުގައި ނިދި މަދުވާނަމަ ގިނައިން ކާ ހިތް ވެ އެވެ. ނޫނީ ގިނައިން ކާ ހިތްވާ ގޮތް މެދުވެރި ކުރުވަ އެވެ. އަދި މީހާ ފަލަވުމަށް މަގުފަހިކުރުވައެވެ.
މިގޮތަށް ދިމާވަނީ ހަމަ ނިދި ނުލިބުމުން ކާ ހިތްވުމަށް މެދުވެރި ކުރުވާ ހޯމޯން ކަމަށްވާ ރެލިން ގިނަވެ، އަދި ކާ ހިތްވުން ކޮންޓްރޯލް ކުރާ ހޯމޯން ކަމަށްވާ ލެޕްޓިން ހަށިގަނޑުގައި މަދުވުމުގެ ސަބަބުންނެވެ.
އެހެން ކަމުން ދަންވަރު ނުނިދައި ހޭލާ ހުންނަ ނަމަ، މާ ބޮޑަށް ކާހިތްވެ އެވެ. އަދި ނޭނގި ނަމަވެސް ބަރުދަން އިތުރު ވުމުގެ ފުރުސަތު ބޮޑުވެ އެވެ.
ކާހިތްވުމާއި ފަލަވުމުގެ އިތުރުން ވެސް ރޭގަނޑު ރަނގަޅަށް ނުނިދުމަކީ ސިއްހީ އެތައް މައްސަލަތަކަކާއި ގުޅިފައިވާ ކަމެކެވެ. އެހެންކަމުން ދުޅަހެޔޮ ސިއްހަތެއްގައި ހުރުމަށް ކަސްރަތާއި ކެއުމަށް ސަމާލުވާ ފަދައިން ރޭނގަޑުގެ އަރާމު ނިދި ހޯދަން މަސައްކަތް ކުރުން ވެސް އެހާ ވަރަށް މުހިންމެވެ. ލޯ މަރައިގެން ނިދަން ކިތައްމެ މަސައްކަތެއް ކުރި ނަމަވެސް ނިދަން އުނދަގޫ ވާނަމަ ނުވަތަ ނިދިފައި އަބަދު އަބަދު ހޭލެވޭނަމަ އެއީ ސަމާލުވެ ޑޮކްޓަރެއްގެ ލަފާ ހޯދަން ޖެހޭ ސިއްހީ މައްސަލައަކަށް ވެސް ވެދާނެ އެވެ. އެ ހާލަތުގައި އަމިއްލައަށް ގޮތް ނުނިންމާ ޑޮކްޓަރުންގެ އެހީ ހޯދައިގެން ކުރިޔަށް ދާށެވެ.
