ރައީސް ޔާމީން މިނިވަން ކުރުމަށް ގޮވާލައި މަޖިލީހަށް ވެއްދި ކުއްލި މައްސަލަ ބޭރުކޮށްލައިފި
ފަސް އަހަރުގެ ޖަލު ހުކުމެއް ތަންފީޒު ކުރަމުންދާ ކުރީގެ ރައީސް އަބްދުﷲ ޔާމީން މިނިވަން ކުރުމަށް ގޮވާލައި ރައްޔިތުންގެ މަޖިލީހަށް ވެއްދި ކުއްލި މައްސަލަ ބޭރުކޮށްލައިފިއެވެ.
މި މައްސަލަ މަޖިލީހަށް ހުށަހެޅުއްވީ މަޑުއްވަރީ ދާއިރާގެ މެމްބަރު އާދަމް ޝަރީފްއެވެ. އެ ކުއްލި މައްސަލަ ތަޅުމަށް ބަލައިގަނެ ބަހުސަށް ހުޅުވާލަން ފެންނަ ކަމަށް ވޯޓު ދެއްވީ ހަތް މެމްބަރުންނެވެ. ބަލައިގަންނަން ނުފެންނަ ކަމަށް 20 މެމްބަރު ވޯޓު ދެއްވި އެވެ. އެހެންކަމުން މައްސަލަ ބަހުސަށް ހުޅުވާނުލަން ފާސްވި އެވެ.
އާދަމް ޝަރީފް ހުށަހެޅުއްވި މައްސަލާގައި ބުނެފައިވަނީ، ކުރީގެ ނައިބު ރައީސް އަހުމަދު އަދީބަށް މަޖުބޫރުކޮށް ޓޯޗާކޮށްގެން ކުރީގެ ޕްރޮސެކިއުޓާ ޖެނެރަލް އައިޝަމް ބިޝާމް ގާނޫނާ ހިލާފަށް އިއުތިރާފުގެ އެއްބަސްވުމެއް އެކުލަވާލާފައިވާ ކަން އިއްޔެ ކްރިމިނަލް ކޯޓުން އަދީބުގެ މައްޗަށް ދައުލަތުން އުފުލި ދައުވާތައް ބާތިލް ކުރަން ކުރި ހުކުމުން ސާފުވާ ކަމަށެވެ.
ރައީސް ޔާމީންގެ މައްޗަށް ދައުވާ އުފުލައި، ހުކުމް ކޮށްފައި ވަނީ އަދީބު ދިން ބަޔާންތަކުގެ މައްޗަށް ކަމަށްވާއިރު، އެ ހެކިތަކަކީ އޭރުގެ ޕްރޮސެކިއުޓާ ޖެނެރަލް ބިޝާމް ގާނޫނާ ހިލާފަށް އުފައްދާފައިވާ ހެކިތަކުގެ މައްޗަށް އިއްވާފައިވާ ހުކުމެއް ކަން އެނގޭ ކަމަށް ވެސް ކުއްލި މައްސަލާގައިވެ އެވެ.
"ރައީސް ޔާމީންގެ މައްޗަށް ކޮށްފައިވާ ހުކުމަކީ ޕްރޮސެކިއުޓާ ޖެނެރަލްގެ އޮފީހުން ގާނޫނާ ހިލާފު ހެކި އުފައްދައިގެން ކޮށްފައިވާ ހުކުމެއް ކަން އެނގެން އޮތުމުން ރައީސް ޔާމީންގެ މައްޗަށް އިއްވި ހުކުމް ބާތިލްކޮށް ވަގުތުން ވަގުތަށް މިނިވަން ކުރަން ގޮވާލަން." ކުއްލި މައްސަލަ ހުށަހަޅުއްވަމުން އާދަމް ޝަރީފް ވިދާޅުވި އެވެ.
Ads by STO
