އަދީބުގެ މައްސަލަ ކޯޓުން ބޭރުކޮށްލި ގާޒީގެ މައްސަލަ މަޖިލީހަށް
ކުރީގެ ނައިބު ރައީސް އަހުމަދު އަދީބުގެ މައްޗަށް ދައުލަތުން އުފުލާފައިވާ ދައުވާތައް ބާތިލްކޮށް ކްރިމިނަލް ކޯޓުން އެ މައްސަލަ ބޭރުކޮށްލަން އިއްޔެ ހުކުމް ކުރި ގާޒީ އިސްމާއީލް ރަޝީދުގެ މައްސަލަ ޖުޑިޝަލް ސާވިސް ކޮމިޝަން (ޖޭއެސްސީ) އިން ބަލަން ގޮވާލައި ރައްޔިތުންގެ މަޖިލީހަށް މައްސަލައެއް ހުށަހަޅައިފި އެވެ.
މި މައްސަލަ މަޖިލީހަށް ހުށަހަޅެއްވީ ހެންވޭރު ހުޅަނގު ދާއިރާގެ މެމްބަރު އަދި އެމްޑީޕީގެ ޗެއާޕާސަން ހަސަން ލަތީފް އެވެ. އެ މައްސަލަ އަށް ބަހުސް ކުރަން ފާސްވީ 21 މެމްބަރުންގެ ވޯޓުންނެވެ.
ލަތީފު މަޖިލީހަށް މިއަދު ހުށަހެޅުއްވި މައްސަލައިގައި ވަނީ އަދީބަށް ކުރި ދައުވާތައް ކޯޓުން ބޭރުކޮށްލީ އިޖުރާއާތުތަކާ ޚިލާފަށް ކަމަށެވެ. ކުށަށް އިއުތިރާފުވުމާ ބެހޭގޮތުން ދައުލަތާއި އަދީބާ ދެމެދު ހެދި އެއްބަސްވުން ގޯސް ކަމަށް ކޯޓުން ނިންމީ އަދީބު އެގޮތަށް އެދިވަޑަައިގެންފައި ނުވަނީސް ކޯޓުގެ އިސް ނެގުމަށް ކަމަށާއި އެއްބަސްވުން ބާތިލް ކުރުމަށް ފަހު ހެކިތަކާ އެކު، މައްސަލަ ކުރިއަށް ގެންދިއުމުގެ ފުރުސަތު ކޯޓުން ދީފައި ނުވަނީ ގާނޫނާ ޚިލާފަށް ކަމަށް ހަސަންގެ ހުށަހެޅުއްވުމުގައި ވެ އެވެ.
އެގޮތަށް ކޯޓުން ނިންމުމުގައި ރިޝްވަތާއި ކޮރަޕްޝަނާއި ނުފޫޒު ހިމެނޭ ކަމަށް ތުހުމަތު ކުރެވޭ ކަމަށާއި އެހެންވެ، އެ ނިންމުން ނިންމެވި ގާޒީ އިސްމާއިލް ރަޝީދުގެ މައްސަލަ ޖުޑީޝަލް ސާވިސް ކޮމިޝަން (ޖޭއެސްސީ) އަށް ހުށަހެޅުމަށާއި އަދީބުގެ މައްސަލަތައް އިސްތިއުނާފު ކުރަން ދައުލަތަށް ގޮވައިލާ ކަމަށް އެ ހަސަންގެ ހުށަހެޅުއްވުމުގައި ބުނެ އެވެ.
ހަސަން ލަތީފް ވިދާޅުވީ ދައުވާ އުފުލޭ މީހަކު ފަހުން އެ ދައުވާއަށް އިންކާރު ކުރިޔަސް ތަހުގީގު އިތުރަށް ފުރިހަމަ ކުރުމަށް ދައުލަތަށް ފުރުސަތު ދޭން ވާނެ ކަމަށް ޖިނާއީ އިޖުރާއަތުގެ ގާނޫނުގައި ބަޔާންކޮށްފައިވާ ކަމަށާއި ނަމަވެސް އެ ފުރުސަތު ވެސް ދީފައިނުވާ ކަމަށެވެ.
