އަދީބު މިނިވަންވީ މައްސަލަ ބެލި ގާޒީގެ ގަމާރު ކަމުން: ނަޝީދު
ކުރީގެ ނައިބު ރައީސް އަހުމަދު އަދީބުގެ މައްޗަށް ކޮށްފައިވާ ދައުވާތައް ބާތިލްވެ މިނިވަންވީ އެ މައްސަލަ ބަލަން އިންނެވި ގާޒީގެ ގަމާރު ކަމުން ކަމަށް މަޖިލީހުގެ ރައީސް، ރައީސް މުހައްމަދު ނަޝީދު ވިދާޅުވެއްޖެ އެވެ.
ނަޝީދު މިހެން ވިދާޅުވީ އަދީބުގެ މައްޗަށް ދައުލަތުން އުފުލާފައިވާ ދައުވާތައް ބާތިލްކޮށް ކްރިމިނަލް ކޯޓުން އެ މައްސަލަ ބޭރުކޮށްލަން އިއްޔެ ހުކުމް ކުރި ގާޒީ އިސްމާއީލް ރަޝީދުގެ މައްސަލަ ޖުޑިޝަލް ސާވިސް ކޮމިޝަން (ޖޭއެސްސީ) އިން ބަލަން ގޮވާލައި ރައްޔިތުންގެ މަޖިލީހަށް ހުށަހެޅި މައްސަލާގައި ބަހުސް ކުރައްވަމުންނެވެ.
ހެންވޭރު ހުޅަނގު ދާއިރާގެ މެމްބަރު ހަސަން ލަތީފް ހުށަހެޅުއްވި މައްސަލާގައި ވަނީ، އެމްއެމްޕީއާރުސީ ބޮޑު ހިޔާނާތުގެ މައްސަލާގައި އަދީބުގެ މައްޗަށް އުފުލި ދައުވާތައް ބާތިލްކޮށް ކޯޓުން މައްސަލަ ބޭރުކޮށްލަން ގާޒީ އިސްމާއިލް ރަޝީދު ހުކުމް ކޮށްފައި ވަނީ ގާނޫނުތަކާއި ގާނޫނީ އިޖުރާއަތްތަކާ ހިލާފަށް ކަމަށެވެ.
ލަތީފުގެ ވާހަކައާ ގުޅުވައިގެން ނަޝީދު ވިދާޅުވީ މުޅި މައްސަލަ ހިނގައި ދިޔައީ ގާޒީގެ ގަމާރު ކަމުން ކަމަށެވެ. އަދި އެއްވެސް އިޖުރާއަތަކަށް ބެއްލެވުމުގެ ގާބިލުކަމެއް ފަނޑިޔާރުގެ ކިބައިގައި ނެތީ ކަމަށާއި ނުވަތަ ގަމާރުކަން އިންތިހާއީ ކަމަށް ނަޝީދު ވިދާޅުވި އެވެ.
"އަޅުގަނޑުމެން މީގާ ބަހުސަށް ދާއިރު ވިސްނަވަންވީ ނުކުތާތަކަކީ މިބާވަތުގެ ކަމެއް ކަނޑައެޅިގެން ރޯމާ ދުވާލު ހިނގާނީ ގާބިލު ނުވަތަ ގަމާރު ކަމުންތޯ. ނޫނިއްޔާ އެހެން ސަބަބުތަކަކަށް ޓަކައިތޯ." ނަޝީދު ވިދާޅުވިއެވެ.
އަދީބަށް ކުރި ދައުވާތައް ބޭރުކޮށްލުމުން އެ މައްސަލަ އިސްތިއުނާފް ކުރަން ޕްރޮސެކިއުޓާ ޖެނެރަލްގެ އޮފީހުން ވަނީ ނިންމައިފަ އެވެ. އަދީބު އިއުތިރާފު ނުވިޔަސް، އޭނާއާ ދެކޮޅަށް ހެކި އެބަހުރި ކަމަށް ޕްރޮސެކިއުޓާ ޖެނެރަލްގެ އޮފީހުން ވަނީ ބުނެފަ އެވެ.
