އިންތިޚާބުގައި ހަރަކާތްތެރިވާ އޮފިޝަލުންގެ ތަމްރީންތައް މާދަމާ ފަށަނީ
އަންނަމަހު ބާއްވާ ލޯކަލް ކައުންސިލްތަކުގެ އިންތިޚާބާއި އަންހެނުންގެ ތަރައްޤީއަށް މަސައްކަތްކުރާ ކޮމިޓީތަކުގެ އިންތިޚާބަށް ބޭނުންވާ އޮފިޝަލުންގެ ގޮތުގައި ގިނަ ބަޔަކު ހަމަޖެހި، މާދަމާ ތަމްރީން ފެށުމަށް އިލެކްޝަންސް ކޮމިޝަނުން ތައްޔާރު ވެއްޖެއެވެ.
އިލެކްޝަންސް ކޮމިޝަނުން ވިދާޅުވީ، ކުރިއަށް އޮތް އިންތިޚާބުގައި އަތޮޅުތަކުގެ ވޯޓްލާ މަރުކަޒުތަކުގައި ހަރަކަތްތެރިވާ އޮފިޝަލުންގެ %80 މީހުން ހަމަ ވެފައިވާ ކަމަށެވެ. އަދި މާލޭގައި ޤާއިމްކުރާ ވޯޓްލާ މަރުކަޒުތަކަށް ބޭނުންވާ އޮފިޝަލުންގެ %60 ހަމަވެފައިވާކަމަށް ވެސް އެކޮމިޝަނުން ވިދާޅުވެއެވެ.
އިލެކްޝަންސް ކޮމިޝަނުން ވިދާޅުވީ، އިންތިޚާބަށް ބޭނުންވާ ޢަދަދަށް އޮފިޝަލުން ހަމަކުރުމަށް ސިޔާސީ ޕާޓީތަކަށާއި، މިނިވަން މުއައްސަސާތަކާއި ސިވިލް ސާރވިސް ކޮމިޝަނާއި، ސްކޫލްތަކުގައި ދަންނަވާފައިވާ ކަމަށެވެ.
ވޯޓުލާ މަރުކަޒުތަކުގައި ހަރަކާތްތެރިވާ އޮފިޝަލުންގެ ގޮތުގައި ކުރިމަތިލާ ފަރާތްތަކަކީ އުމުރުން 18 އަހަރު ވެފައިވާ އަދި އެއްވެސް ސިޔާސީ ޕާޓީއެއްގެ އިސް މަޤާމެއް އަދާ ކުރަމުންދާ ފަރާތެއް ކަމުގައި ވެގެން ނުވާނެ ކަމަށް އީސީން މައުލޫމާތު ދެއެވެ.
އަދި އެއްވެސް ކެންޑިޑޭޓެއްގެ ކެމްޕޭން ޙަރަކާތްތަކުގައި ޢަމަލީ ގޮތުން ބައިވެރިވާ މީހަކު ކަމުގައި ނުވުމާއި އޮފިޝަލަކަށްވުމަށް އެދި ފޯމު ހުށަހެޅި ދާއިރާ، ރަށަށް ކުރިމަތިލާ ކެންޑިޑޭޓެއްގެ މަންމައެއް، ބައްޕައެއް، ދަރިއެއް، އަނތްބެއް، ފިރިއެއް، އެއްބަނޑުއެއްބަފާ، އެއްބަނޑު ނުވަތަ އެއްބަފާ މީހަކަށް ވެސް ވެގެން ނުވާނެ ކަމަށް އީސީން ކުރި އިއުލާނުގައި ވެއެވެ.
އިންތިޚާބު ފެށުމުގެ ކުރިން އޮފިޝަލުން ހަމާ ވާނެކަމަށް ވެސް އީސީން ވިދާޅުވެއެވެ.
