މުއިއްޒުގެ ރައްދު އަސްލަމަށް: ހިޔާގެ އެއް ކޮޓަރީގެ ފްލެޓްތައް ފެނިވަޑައިނުގެން ބޭފުޅަކަށް ފޯމްތަކެއް ނުފެނުން އެކަށީގެންވޭ!
"ވެށި ފަހި މާލެ ޕްރޮގްރާމް"ގެ ލިޔެކިޔުންތައް ދައުލަތުގައި މިހާރު ނެތްކަމުގައި ހައުސިން އެންޑް ޕްލޭނިން މިނިސްޓަރު މުހައްމަދު އަސްލަމް ވިދާޅުވުމުން ކުރީގެ ހައުސިން މިނިސްޓަރު ޑރ. މުހައްމަދު މުއިއްޒު އެކަމަށް ރައްދު ދެއްވައިފިއެވެ.
އަސްލަމް އެހެން ވިދާޅުވީ މިއަދު ރައްޔިތުންގެ މަޖިލީހުގެ ތަޅުމުގައި ގަލޮޅު ދެކުނު ދާއިރާގެ މެމްބަރު މީކާއިލް ނަސީމް ކުރެއްވި ސުވާލަށް ޖަވާބު ދެއްވަމުންނެވެ.
އެގޮތުން މިނިސްޓަރު އަސްލަމް ވިދާޅުވީ ވެށިފަހި މާލޭގެ ޕްރޮގުރާމުތަކުގެ ތެރެއިން ފްލެޓަށް އެދުނު މީހުންގެ އެއްވެސް ލިޔެކިޔުމެއް ދައުލަތުގެ އެއްވެސް މުއައްސަސާއެއްގައި ނެތްކަމަށާއި އެއީ ކަންބޮޑުވާންޖެހޭ ކަމެއް ކަމަށެވެ.
އަސްލަމް އަށް ރައްދު ދެއްވަމުން މުއިއްޒު ކުރެއްވި ޓްވީޓެއްގައި ވިދާޅުވީ ހިޔާ މަޝްރޫއުގެ އެއް ކޮޓަރީގެ ފްލެޓްތައް އަޅާފަހުރި ތަން ފެނިވަޑައިނުގެން ބޭފުޅަކަށް ފޯމް ތަކެއް ނުފެނުން އެކަށީގެންވާ ކަމަށެވެ.
މީގެ ކުރިން ބޭއްވި ނޫސްވެރިންގެ ބައްދަލުވުމެއްގައި މިނިސްޓަރު އަސްލަމް ވިދާޅުވީ 18-40 އަހަރާ ދެމެދުގެ އުމުރު ފުރާ އާއި މާލެ ރަށްވެހިންނާއި، ދަފުތަރުގައި ތިބި މީހުންނާއި އަލަތު ކައިވެނި ކުރާ ފަރާތްތައް އަދި ނުކުޅެދުންތެރިކަން ހުންނަ ފަރާތްތަކަށް ދޭން އިއުލާން ކުރި އެއް ކޮޓަރީގެ ފްލެޓްތަކުގެ މަސައްކަތް ފަށާފައި ނުވާ ކަމަށެވެ.
ނަމަވެސް އެތަނުގެ މަސައްކަތް ކުރިއަށްދާ ގޮތް ބަލާލުމަށް އިދިކޮޅު ލީޑާޝިޕުން މި މަހުގެ ހަތް ވަނަ ދުވަހު ހުޅުމާލެ ދެވަނަ ފިޔަވައްސަށް ކުރި ޒިޔާރަތަށްފަހު ވަނީ އެތަނުގައި އެއް ކޮޓަރީގެ ފްލެޓްތައް އެބަހުރި ކަމަށް ބުނެފައެވެ.
Ads by STO
