އަލްހާންގެ ރައްދު: މަންޒަރު ބަލަން ދިވެހިން ނުތިބޭނެކަން ހަނދާން ކޮށްދެން، ވައްޓާލާނަން!

ކުރިންވެސް ވެރިކަން ވެއްޓުނީ ދީނާއި ކުޅެން ދިމާކުރުމުން ކަމަށާއި މެދުމިނަށް ތާއީދޭ ކިޔައިގެން އައުރަ ނިވާ ނުކޮށް މުޒާހަރާ ކުރަން ނިކުތުމުން ކަމަށް ރައްޔިތުންގެ މަޖިލިހުގެ ފޭދޫ ދާއިރާގެ މެމްބަރު އަދި މިހާރު މާލެ ސިޓީގެ މޭޔަރު ކަމަށް ވެސް ވާދަ ކުރައްވާ ކެންޑިޑޭޓް އަލްހާން ފަހުމީ ވިދާޅުވެއްޖެއެވެ.

Ads by STELCO

އަލްހާން މިހެން ވިދާޅުވެފައިމިވަނީ މަޖިލިހުގެ ނައިބު ރައީސް އަދި ގަލޮޅު އުތުރު ދާއިރާގެ މެންބަރު އީވާ އަބްދުﷲ އާއި މަޝްހޫރު ދީނީ ޢިލްމުވެރިޔާ ޑރ. މުޙައްމަދު ޢިޔާޒް އަބްދުއްލަތީފް އާއި ދެމެދު ވަރުގަދަ ބަހުގެ ހަމަލާތަކެއް ދެމުން ގެންދާ ދަނޑިވަޅެއްގައެވެ.

އެގޮތުން އަންހެނުންނަށް ލިބެމުންދާ ޖިންސީ ގޯނާއާއި ގުޅޭގޮތުންް ޑރ. އިޔާޒް ދެއްވި ނަސޭޙަތުގެ ނަސްފުޅަކަށް މަޖިލިހުގެ ނައިބު ރައީސް އީވާ ވިދާޅުވެފައިވަނީ "އެއީ މުޑުދާރު" ވާހަކަތަކެއް ކަމަށެވެ.

"އަނެއްކާވެސް މަޖްލިސް ހިސޯރުކޮށްގެން މުޙައްމަދު ނަޝީދު އެމަސައްކަތް ކުރިއަށް ގެންދާ މަންޒަރު ބަލަން ދިވެހިން ނުތިބޭނެކަން ހަނދާންކޮށްދެން- ވައްޓާލާނަން" އެވާހަކަތަކާއި ގުޅިގެން އަލްހާން ފަހުމީ ޓްވިޓާގައި ވިދާޅުވެފައިވެއެވެ.