ގެވެށި އަނިޔާއާއި ދެކޮޅަށް ސަރުކާރުން ފަށާ ޤައުމީ ކެމްޕެއިން "ގެވެށި ގުޅުން" އިފްތިތާހް ކޮށްފި
އަންހެނުންނާއި ކުޑަކުދިންނަށް ކުރާ ޖިންސީ އަނިޔާއާއި، ގެވެށި އަނިޔާއާއި ދެކޮޅަށް ސަރުކާރުން ފަށާ ޤައުމީ ކެމްޕެއިން "ގެވެށި ގުޅުން" އިފްތިތާޙްކޮށްފިއެވެ.
މިކެމްޕެއިން އިފްތިތާޙްކޮށްދެއްވީ މިނިސްޓަރ އޮފް ޖެންޑަރ ފެމިލީ އެންޑް ސޯޝަލް ސަރވިސެސް އައިޝަތު މުޙައްމަދު ދީދީއެވެ.
މިރަސްމިއްޔާތުގައި ރާއްޖޭގެ ރައީސުލް ޖުމްހޫރިއްޔާ އިބްރާހިމް މުޙައްމަދު ޞާލިހު ވަނީ ގެވެށި އަނިޔާއާއި ގުޅޭގޮތުން ވީޑިއޯ މެސެޖެއް ވެސް ދެއްވާފައެވެ.
ގެވެށިއަނިޔާފަދަ އަމަލުތައް ހުއްޓުވުމަށްޓަކައި މުވައްސަސާތަކައި ޖަމްޢިްޔާ ޖަމާއަތްތަކާއި އާންމު ރައްޔިތުންގެ އެއްބާރުލުން ބޭނުންވާކަން ފާހަގަކުރައްވާ ރައީސް ޞާލިޙު ވިދާޅުވީ މި ކެމްޕެއިން ކާމިޔާބުކަމާއެކު ކުރިއަށްގެންދިއުމަށް އެންމެންގެ އެއްބާރުލުން ބޭނުންވާކަމަށެވެ.
ގެވެށި އަނިޔާއާއި ދެކޮޅަށް ކުރިއަށްގެންދާ މި ކެމްޕެއިން ފެށުމުގެ ރަސްމިއްޔާތުގައި ވާހަކަދައްކަވަމުން ޖެންޑަރ މިނިސްޓަރ ވިދާޅުވީ، މިފަދަ މައްސަލަތަކަކީ އަބަދުވެސް ކަންބޮޑުވުން އޮތް ކަމެއްކަމަށާއި، މި ފެށި މަސައްކަތަކީ މިކަމަށް އެކަށޭނަ ބަދަލެއް ގެނައުމަށް ސަރުކާރުން ފެށި މަސައްކަތެއްކަމަށެވެ.
