އަދީބުގެ މައްސަލަތައް ބޭރުކޮށްލި ގާޒީގެ މައްސަލަ ބަލަނީ
ކުރީގެ ނައިބު ރައީސް އަހުމަދު އަދީބުގެ މައްޗަށް އުފުލި ހަތް ދައުވާ ބާތިލް ކުރަން ނިންމި ކްރިމިނަލް ކޯޓްގެ ގާޒީ އިސްމާއީލް ރަޝީދުގެ މައްސަލަ ބަލަން ޖުޑީސަލް ސާވިސް ކޮމިޝަން (ޖޭއެސްސީ) އިން ނިންމައިިފި އެވެ.
އަދީބުގެ މައްޗަށް ކުރެވުނު ހުރިހާ ދައުވާއެއް ބާތިލްކުރުމަށް ނިންމާފައިވަނީ އިއްޔެއެވެ. އެއާއެކު އަދީބު ވަނީ މިނިވަން ވެފައެވެ.
އެ މައްސަލަ އެގޮތަށް ނިންމުމާއެކު ޕްރޮސިކިއުޓާ ޖެނަރަލް (ޕީޖީ) ހުސެއިން ޝަމީމް ވަނީ އެކަމަށް ވަރަށް ބޮޑަށް ފާޑުވިދާޅުވެ، ގާޒީ އިސްމާއީލް ރަޝީދުގެ މައްސަލަ ބެލުމަށް ޖޭއެސްސީއަށް ހުށައަޅުއްވާނެ ކަމަށް ވެސް ވިދާޅުވިއެވެ.
ޖޭއެސްސީން މިރޭ ބުނީ މިއަދު ބޭއްވި އެ ކޮމިޝަންގެ 50 ވަނަ ބައްދަލްވުމުގައި ގާޒީ އިސްމާއީލް ރަޝީދުގެ ސުލޫކީ މައްސަލަ ބެލުމަށް ނިންމާފައިވާ ކަމަށެވެ
އެއީ ކުރީގެ ނައިބު ރައީސް އަހުމަދު އަދީބުގެ މައްޗަށް އުފުލި ހަތް ދައުވާގެ މައްސަލާގައި ފަނޑިޔާރުންގެ ގާނޫނާއި ފަނޑިޔާރުން އަމަލުކުރަން ޖެހޭ ސުލޫކީ މިންގަޑާއި ހިލާފަށް އަމަލުކޮށްފައިވާ ކަމަށް ބުނެ އެ ކޮމިޝަނަށް ހުށައަޅާފައިވާ މައްސަލައެއް ކަމަށްވެސް ޖޭއެސްސީ އިން ހާމަކުރިއެވެ.
އިއްޔެ ބޭއްވި ނޫސްވެރިންގެ ބައްދަލުވުމެއްގައި ޕީޖީ ޝަމީމް ވިދާޅުވީ، ކްރިމިނަލް ކޯޓުގެ ނިންމުން ގާނޫނީ ގޮތުން ބަލައިނުގަނެވޭ ކަމަށާއި އެ ނިންމުން ނިންމީ ޖިިނާއީ އިޖުރާއާތުގެ ގާނޫނާ ޚިލާފަށް ކަމަށެވެ. ދައުލަތާއި އަދީބާ ދެމެދުު ހަދާފައިވާ އިއުތިރާފް އެއްބަސްވުމުން ބާތިލް ކުރަން އަދީބުގެ ފަރާތުން އެދިވަޑައިގެންފައި ނުވަނީސް އެގޮތަށް ނިންމީ ކޯޓުގެ އަމިއްލަ އިސް ނެގުމުގައި ކަމަށް ޝަމީމް ވިދާޅުވި އެވެ. އެހެންވެ، އެ ނިންމުން އިސްތިއުނާފު ކުރާނެ ކަމަށް ޕީޖީ ވިދާޅުވި އެވެ.
އަދީބުގެ މައްޗަށް އެކި މައްސަލަތަކުގައި ކުރިން 33 އަހަރުގެ ޖަލު ހުުކުމެއް ވެސް އިއްވި އެވެ. އެކަމަކު ފަހުން މަތީ ކޯޓުތަކުން އެ ހުކުމްތައް ވަނީ ބާތިލްކޮށްފަ އެވެ.
Ads by STO
