ކުޑަކުދިންނާ ގުޅުންހުރި މައްސަލަތައް 53 އިންސައްތަ މައްޗަށް

ފާއިތުވި 2020 ވަނަ އަހަރު ހިއުމަން ރައިޓްސް ކޮމިޝަން (އެޗްއާރްސީއެމް) އަށް ހުށަހެޅުނު ކުޑަކުދިންނާ ގުޅުންހުރި މައްސަލަތައް އޭގެ ކުރީ އަހަރާ ބަލާއިރު 53 އިންސައްތަ އިތުރުވެއްޖެއެވެ.

Ads by STELCO

އެޗްއާރުސީއެމް އިން އެ ކޮމިޝަނަށް މިދިޔަ އަހަރު ހުށަހެޅުނު މައްސަަލަތަކުގެ ތަފާސް ހިސާބުތައް މިއަދު އާންމު ކުރިއިރު، އެޗްއާރުސީއެމްއަށް މިދިޔަ އަހަރު 627 މައްސަލަ އެއް ހުށަހެޅިފައިވެއެވެ. އެއީ އެ ކޮމިޝަނުން އިސްނަގައިގެން ބެލި 157 މައްސަލައަކާއި، ކޮމިޝަނަށް ހުށަހަޅާފައިވާ 510 މައްސަލައެވެ.

މިދިޔަ އަހަރު އެޗްއާރުސީއެމްއަށް ހުށަހެޅިފައިވާ މައްސަލަތައް:

– ޢާއިލާ ބިނާކުރުމުގެ ޙައްޤާއި ކުޑަކުދިންގެ ޙައްޤުތަކާ ގުޅުންހުރި 75 މައްސަލަ
– އުނގެނުމުގެ ޙައްޤާ ގުޅުންހުރި 3 މައްސަލަ
– ޢުމުރުން ދުވަސްވީ ފަރާތްތަކުގެ ޙައްޤުތަކާ ގުޅުންހުރި 15 މައްސަލަ
– ލާއިންސާނީ އަނިޔާއާއި ގުޅުންހުރި 54 މައްސަލަ
– ބޯހިޔާވަހިކަމާ ގުޅުންހުރި 16 މައްސަލަ
– ޙާއްޞައެހީއަށް ބޭނުންވާ މީހުންގެ ޙައްޤުތަކާ ގުޅުންހުރި 11 މައްސަލަ
– އިޖްތިމާޢީ ޙައްޤުތަކާ ގުޅުންހުރި 56 މައްސަލަ
– މަސައްކަތްކުރުމުގެ ޙައްޤާ ގުޅުންހުރި 102 މައްސަލަ
– ޝަރުޢީ ދާއިރާގެ ޙައްޤުތަކާ ގުޅުންހުރި 32 މައްސަލަ
– ޤައިދީންގެ ޙައްޤުތަކާ ގުޅުންހުރި 90 މައްސަލަ
– ބަންދުކުރެވޭ ފަރާތްތަކުގެ ޙައްޤުތަކާ ގުޅުންހުރި 35 މައްސަލަ

2019 އަހަރާއި އަޅާބަލާއިރު 2020 ގައި ކުޑަކުދިންނާ ގުޅުންހުރި މައްސަލަތައް 53 ޕަސެންޓް އިތުރުވެފައިވާ ކަން ވެސް އެޗްއާރްސީއެމްއިން ފާހަގަ ކުރިއެވެ. އަދި ވަޒީފާގައި ދިމާވާ އެކިއެކި މައްސަލަތަކުގެ ނިސްބަތް 205 ޕަސެންޓަށް އިތުރުވެފައިވާ ކަމަށް ވެސް އެ ކޮމިޝަނުން ބުނެފައިވެއެވެ.

ވޭތުވެދިޔަ އަހަރުގެ ތެރޭގައި ހުށަހެޅިފައިވާ މައްސަލަތަކާއި، އަދި 2015 ވަނަ އަހަރުން ފެށިގެން ހުށަހެޅި ނުނިމި ހުރި މައްސަލަތަކުގެ ތެރެއިން 308 މައްސަލައެއް ކޮމިޝަނުން ވަނީ މިދިޔަ އަހަރު ނިންމާފައެވެ.