ލ.ގަމުގައި ހިނގި ނުރައްކާތެރި އެކްސިޑެންޓްގައި އަނިޔާވި އެކަކު އައިސީޔޫގައި، އިތުރު ފަރުވާއަށް މާލެއަށް
ލ ގަމުގައި ހިނގި ނުރައްކާތެރި އެކްސިޑެންޓެއްގައި އަނިޔާ ލިބުނު މީހުންގެ ތެރެއިން އެކަކު ، އިތުރު ފަރުވާއަށް މާލެ ގެންނަން ނިންމައިފިއެވެ.
"ދެން" އަށް މައުލޫމާތު ދެއްވަމުން ލ.ގަން ރީޖަނަލް ހޮސްޕިޓަލުގެ މެނޭޖަރ އަލީ ނަޝީދު ވިދާޅުވީ އެކްސިޑެންޓުގައި އަނިޔާ ލިބުނު 55 އަހަރުގެ އަންހެން މީހާގެ ސިކުނޑިއަށް ލޭ އެޅިފައިވާ ކަމަށް ސީޓީ ސްކޭން ތަކުން ދެއްކުމާ ގުޅިގެން އިތުރު ފަރުވާއަށް ޑޮކްޓަރުންގެ ލަފައާއެކު މާލެ ގެންދިއުމަށް ނިންމައިފައިވާ ކަމަށެވެ.
“އެކްސިޑެންޓު ވީ ދެސައިކަލުގައި ތިބި ދެ އަންހެނުންނަށް ވަނީ ބޮޑެތި އަނިޔާ ތަކެއް ވެފަ. މީހެ ތެރެއިން އެކަކު އައިސީޔޫގައި ފަރުވާ ދެމުން ދާއިރު އަނެކަކުގެ ކަރު ކައިރީ ކަށިގަނޑު ވަނީ ބިންދައިގެން ގޮސްފަ. ސައިކަލުގައި ތިބި ދެފިރިހެނުންނަށް ވަނީ ކުދި ޒަޚަމް ތަކެއް ލިބިފަ”އަލީ ނަޝީދު ވިދާޅުވިއެވެ.
މި އެކްސިޑެންޓު ހިނގާފައި ވަނީ މިއަދު ހަވީރުގެ ވަގުތެއްގައި ލ.ގަމު މުކުރިމަގު އަވަށުގައެވެ. އަދި އައިސީޔޫގައި ފަރުވާ ދެމުންދާ އަންހެން މީހާ އަކީ ވެސް އެ އަވަށުގެ މީހެއް ކަމަށް "ދެން"އަށް މައުލޫމާތު ދެއްވަމުން އަލީ ނަޝީދު ވިދާޅުވިއެވެ.
ލ ގަމުގައި މި އަހަރު ކުރީކޮޅު ހިނގި ނުރައްކާތެރި ހާދިސާއެއްގައި ޕާކު ކޮށްފައި އޮތް ލޮރީއެއްގައި ޖެހި އެކްސިޑެންޓުވި މީހެއް ވަނީ ނިޔާ ވެފައެވެ.
