ޒުވާން މޫނެއް ބޭނުންނަމަ، މޫނުގައި އުނގުޅަންވީ އެއްޗަކީ ދޮންކެޔޮ!
ދޮންކޭލަކީ ދިވެހީންގެ މެދުގައި މަގުބޫލު މޭވާއެކެވެ. އާންމުކޮށް ދިވެހިންގެ ތެރޭގައި ދޮންކެޔޮ ބޭނުން ކުރަނީފޮނި ކާއެއްޗެހި ތައްޔާރު ކުރުމަށާއި، ހެނދުނުގެ ނާސްތާއަށެވެ. ގިނަ އަދަދަކަށް ވިޓަމިން އެކުލެވޭ މި މޭވާ އަކީ ތަފާތު އެތަކެއް ފައިދާތަކެއް އެއިން ލިއްބައިދޭ މޭވާ އެއްވެސް މެއެވެ.
އެގޮތުން ދޮންކެޔޮ ބޭނުންކޮށްގެން ރީތިވާ ސާމާނުވެސް އުފައްދާއިރު މި މޭވާ އަކީ ގޭގައި ވެސް ތަފާތު އެކި އެކި ފޭޝަލް ހެދުމަށް ބޭނުން ކުރެވިދާނެ މޭވާއެކެވެ.
ދޮންކޭލުން ހަމަށް ލިބޭ ފައިދާތަކަށް ބަލާއިރު، އޭގައި އެކުލެވިގެންވާ ވިޓަމިން އޭގެ ސަބަބުން، ހަމުގައި ހުންނަ ލަކުނުތައް ފިލުވުމަށް އެހީތެރިވެދެއެވެ. އަދި ދޮންކޭލުގައިވާ ވިޓަމިން ބީގެ ސަބަބުން، ހަމުގައި ރޫ ޖެހުން ދުރު ކޮށްދީ، ހަން ތެތް ކޮށްދެއެވެ. ދޮންކޭލުގައި ވިޓަމިން އީވެސް އެކުލެވިގެންވެއެވެ. ވިޓަމިން އީގެ ސަބަބުން އިރުގެ ނުރައްކާތެރި ދޯދިތަކުން ހަން ސަލާމަތް ކޮށްދެއެވެ.
އެގޮތުން މޫނުގެ ހަން ޒުވާން ކޮށްލައި ތާޒާ ކޮށްލުމަށް، ދޮންކެޔޮ މާސްކެއް ތައްޔާރުކޮށްލާނެ ގޮތް ހިއްސާކޮށްލާނަމެވެ.
ދޮންވެފައިވާ ދޮންކެޔޮ ވަކެއް ބޭނުން ކޮށްގެން ޕޭސްޓެއް ތައްޔާރު ކޮށްލާށެވެ. އިތުރު އެއްވެސް އެއްޗެއް މި ޕޭސްޓަށް ބޭނުމެއް ނުވެއެވެ. ދެން ތައްޔާރު ކުރި ޕޭސްޓް މޫނުގައި ހޭކުމަށްފަހު، 15 ނުވަތަ 20 މިނެޓްވަންދެން ބަހައްޓާށެވެ. މިއީ މޫނުގެ ހަން އަލިކޮށްދީ، އޮމާން ކޮށްދޭނެ ކަމެކެވެ
