ފުލުހުންގެ އާ ގާނޫނާ ގުޅޭ ގޮތުން ކޮމިޝަނަރގެ އިލްތިމާސެއް ފުލުހުންނަށް!

މިމަހުގެ 27 ވަނަ ދުވަހު އަމަލު ކުރަން ފަށާ ދިވެހި ފުލުހުންގެ ޚިދުމަތުގެ ޤާނޫނުން ތަސައްވަރުކުރާ ފުލުހުންގެ ޚިދުމަތް ބިނާ ކުރުމަށް ހުރިހާ ފުލުހުންނާއި މުވައްޒަފުން އަތުކުރި އޮޅާލުމަށް ކޮމިޝަނަރ އޮފް ޕޮލިސް މުޙައްމަދު ޙަމީދު އިލްތިމާސް ކުރައްވައިފިއެވެ.

Ads by Hajj Corporation

ކޮމިޝަނަރ އޮޮފް ޕޮލިސް މިކަމަށް އިލްތިމާސް ކުރެއްވީ ޕޮލިސް ޓްރެއިނިންގ ސްކޫލް - ދ. ވާނީގައި ރޭ ބޭއްވި 32 ވަނަ ޕޮލިސް ރެކްރޫޓް ޓްރެއިނިންގ ކޯހުގެ ދަސްވެނިވި ހިނގާލުމުގެ ރަސްމިއްޔާތުގައި ދެއްކެވި ވާހަކަފުޅުގައެވެ.

މިރަސްމިއްޔާތުގައި ކޮމިޝަނަރ އޮފް ޕޮލިސް ދެއްކެވި ވާހަކަފުޅުގައި ވަނީ މިމަހުގެ 27 ވަނަ ދުވަހު އަމަލުކުރަން ފަށާ ފުލުހުންގެ އައު ޤާނޫނަކީ ދިވެހި މުޖުތަމަޢު އެދޭފަދަ ޒަމާނީ ޑިމޮކްރެޓިކް އުސޫލުތަކާއި، އިންސާނީ ހައްޤުތަކަށް ހުރުމަތްތެރިކޮށް ހިތައި، ދައުލަތުން ފުލުހުންގެ ހިދުމަތަށް ކުރާ ހޭދައާ ބައްދަލު ހިދުމަތެއް ފޯރުވައިދީ، އެކަންކަމަށް މުއައްސަސާ ޖަވާބުދާރީ ކުރުވުމުގެ އިންތިޒާމްތައް ހަރުދަނާ ކުރުވާނެ ގާނޫނެއްކަމަށް ވިދާޅުވިއެވެ.

ހަމައެއާއެކު ފުލުހުންގެ ޕްރޮފެޝަން ތަރައްޤީކޮށް ގާބިލްކަން އިތުރުކޮށް، ލޯކަލް ލެވަލްގައި ރައްޔިތުންނާއި އެހެން ފަރާތްތައް ގުޅިގެން ޕްރޯ އެކްޓިވް ޕޮލީސިންގ ފަލްސަފާއެއްގެ މައްޗަށް ފުލުހުންގެ ހިދުމަތް ފޯރު ކޮށްދިނުމަށް އައު ގާނޫނު ލާޒިމް ކުރާކަމަށް ވިދާޅުވިއެވެ. އަދި އައު ޤާނޫނުން ތަސައްވަރުކުރާ ފުލުހުންގެ ޚިދުމަތް ބިނާ ކުރުމަށް ހުރިހާ ފުލުހުންނާއި މުވައްޒަފުން އަތުކުރި އޮޅާލުމަށް އިލްތިމާސް ކުރައްވައި، މިކަމުގައި ކޮންމެ ފުލުހަކާއި މުވައްޒަފެއްގެ ދައުރެއް އެބައޮތް ކަމަށް ވެސް ކޮމިޝަނަރ ވިދާޅުވިއެވެ.

ވަކިން  ހާއްސަކޮށް ޕޮލިސް ރެކްރޫޓް ޓްރެއިނިންގ ފުރިހަމަކޮށް ދަސްވެނިވާ ދަސްވެނިން ވެގެންދާނީ ޚިދުމަތުގެ މިއާބާބުގެ ތެރެއަށް ވަންނަ އާޖީލެއްގެ ފުލުހުން ކަމަށް ވާއިރު، އާ ޤާނޫނުން ފުލުހުންގެ ޚިދުމަތަށާއި ފުލުހުންގެ ޕްރޮފެޝަންއަށް ލިބިގެންދާނެ އަލިކަން ގަދަކޮށް އެއަލިކަން ދެމެހެއްޓުމަށް މަސައްކަތްކު ރާނެ ދަރުމަވެރިންނަށް ދަސްވެނިވާ ފުލުހުން ވެގެން ދާނެކަމަށް ވިދާޅުވިއެވެ.