އެއްވެ އުޅުމުގެ މިނިވަންކަން ހަނިކުރާ ޤާނޫނު އުވާނުލާތީ މައުމޫންގެ ކަންބޮޑުވުން
އެއްވެ އުޅުމުގެ މިނިވަންކަން ހަނިކޮށް ކުރީ ސަރުކާރުން ފާސްކޮށްފައިވާ ޤާނޫނު އުވާލާފައި ނުވާތީ ކުރީގެ ރައީސް މައުމޫން އަބްދުލް ޤައްޔޫމް ކަންބޮޑުވުން ފާޅުކުރައްވައިފިއެވެ.
ހުއްދަ ހޯދުމެއް ނެތި މާލޭގައި މުޒާހަރާ ކުރެވޭނީ ހޯމް މިނިސްޓްރީން ކަނޑައަޅާ ތަންތަނުގައި އެކަނި ކަމަށް ކުރީގެ މަޖިލީހުން އޮގަސްޓް 18، 2016 ގައި ވަނީ، އެއްވެ އުޅުމުގެ ގާނޫނަށް އިސްލާހު ގެނެސްފަ އެވެ. އެ އިސްލާހަށް ފަހު، މާލޭގައި ހުއްދަ ނުހޯދާ މުޒާހަރާކުރެވޭނީ ކާނިވާ ސަރަހައްދުގައި އެކަނި ކަމަށް އޮތީ ކަނޑައަޅައިފަ އެވެ.
މައުމޫން ކުރެއްވި ޓްވީޓެއްގައި ވިދާޅުވީ، ރޭ މޯލްޑިވްސް ރިފޯމް މޫވްމެންޓްގެ އެގްޒެކެޓިވް ކޮމިޓީގެ ބައްދަލުވުމެއް ބޭއްވި ކަމަށާއި، އެއްވެ އުޅުމުގެ މިނިވަންކަން ހަނި ކުރެވޭ ގޮތަށް ހަދާފައިވާ ޤާނޫނު އުވާލުމަށް މަޖިލިހަށް ހުށަހަޅާފައިވާތާ އަހަރަކާއި ގާތްވެފައިވާ ކަން އެކޮމިޓީގެ މެމްބަރުން ފާހަގަކުރެއްވި ކަމަށެވެ.
އަދި އެ މައްސަލައަށް އަޅާ ނުލައި ދޫކޮށްލާފައިވަނީ ކީއްވެގެންތޯ މައުމޫން ވަނީ ސުވާލުކުރައްވާފައެވެ.
ހޯމް މިނިސްޓްރީން މިދިޔަ އަންގާރަ ދުވަހު ނެރުނު ނޫސް ބަޔާނެއްގައި ވަނީ މާލޭގައި އެއްވެވޭނީ ކުރިން ހުއްދަ ހޯދައިގެން ކަމާއި، ހުއްދަ ނުހޯދައި އެއްވެވޭނީ ކާނިވާއަށް އެކަނި ކަން ހަނދާން ކޮށްދީފަ އެވެ.
Ads by STO
