ސަފަރީން އަންހެން މީހާ މޫދަށް ފުންމާލީ ވަރަށް ބޮޑު ކަމެއް ދިމާވެގެންކަން ގަބޫލު ކުރެވޭ: ފުލުހުން
ހުޅުމާލެ ފަޅުތެރޭގައި އަޅާފައި އޮތް ސަފަރީއެއްގައި ބިދޭސީ އަންހެނަކަށް ޖިންސީ ގޯނާ ކުރި މައްސަލާގައި އެ އަންހެން މީހާ މޫދަށް ފުންމާލީ ވަރަށް ބޮޑު ކަމެއް ދިމާވެގެންކަން ގަބޫލު ކުރެވޭ ކަމަށް ފުލުހުން ބުނެފިއެވެ.
މިހާރު ކުރިއަށްދާ ނޫސްވެރިންގެ ބައްދަލުވުމުގައި ޗީފް އިންސްޕެކްޓަރ އޮފް ޕޮލިސް މަރިޔަމް އަޒްމާ ވިދާޅުވީ މިމައްސަލަ ފުލުހުންނަށް ހުށަހެޅީ 26 ޖޫން ގައި ކަމަށާއި އެދުވަހުގެ ފަތިހު 5:00 ހާއިރު ހުޅުމާލޭ ލަކުޑި ޖެޓީ ސަރަޙައްދުގައި ބިދޭސީ އަންހެނަކާއި ދެ ފިރިހެނުން އެއްކޮށް ތިބިތަން ފުލުހުންނަށް ފެނިފައިވާ ކަމަށެވެ.
ބިދޭސީ އަންހެން މީހާއާއި ފުލުހުން އެވަގުތު ސުވާލު ކުރުމުން ބިދޭސީ އަންހެން މީހާ ފުރަތަމަ ދެއްކީ ފޯނު ނުފެނިގެން އުޅޭ ވާހަކަ ކަމަށާއި އިތުރަށް ވާހަކަ ދެއްކުމުން ޖޫން 25 ވަނަ ދުވަހު ރަށްޓެއްސެއްގެ ފަރާތުން ލިބުނު ސަފާރީއަށް ގޮސް ވަގުތު ހޭދަ ކުރި ކަމަށާއި ސަފާރީ ތެރޭގައި ބިދޭސީ މީހާގެ ނުރުހުމުގައި އޭނަގެ ގައިގާ ސަފާރީގައި ހުރި މީހަކު އަތްލާ ޖިންސީ ގޯނާ ކުރިކަމަށް އަންހެން މީހާ ބުނި ކަމަށް އަޒްމާ ވިދާޅުވެފައިވެއެވެ.
"އެމީހުންގެ ޢަމަލުތައް ހުރި ގޮތުން އެފަދަ ޢަމަލެއް ތަކުރާރު ކޮށްފާނެ ކަމަށް އޭނައަށް ޤަބޫލު ކުރެވޭތީ އެކަމުން ސަލާމަތްވުމުގެ ގޮތުން މޫދަށް ފުންމާލި ކަމަށް. އަދި ޑިންގީ އެއްގައި އެސަފާރީގެ ދެމީހަކު އައިސް އޭނާ ނެގިއްޔޭ، ނަގައިގެން ގެނެސް ޖެޓީއަށް ބޭލިކަމަށް ބުނެފައިވޭ" އަޒްމާ ވިދާޅުވިއެވެ.
މީގެ އިތުރުން އަޒްމާ ވިދާޅުވީ އެމައްސަލައާއި ގުޅިގެން ބިދޭސީ މީހާ ހާޒިރުކޮށް އެވަގުތު އެތަނުގައި ތިބި ދެމީހުން ފުލުހުންގެ ބެލުމުގެ ދަށަށް ގެންދެވުނު ކަމަަށެވެ. އަދި ބިދޭސީ މީހާ ޑޮކްޓަރަށް ދެއްކުމުގެ މަސައްކަތްތައް ހަމަޖައްސާ ދެވުނު ކަމަށް ވެސް އަޒްލާ ވިދާޅުވެފައިވެއެވެ.
މިމައްސަލައިގައި ތަހުގީގަށް ބޭނުންވާ މައުލޫމާތުތައް އެއްކުރެވިފައިވާ ކަމަށާއި މިމައްސަލައިގައި މިހާތަނަށް 11 ފަރާތެއްގެ ބަޔާން ނެގިފައިވާ ކަމަށް ވެސް އަޒްމާ ވިދާޅުވިއެވެ.
ފުލުހުންގެ ފޮރެންސިކް ޑައިވިންގ ޓީމުން ސަފާރީ އަޅާފައި އޮތް ސަރަަހައްދަށް ޑައިވްކޮށް، ބިދޭސީ އަންހެން މީހާގެ ފޯނު ހޯދިފައިވާ ކަމަށް ވެސް އަޒްމާ ވިދާޅުވިއެވެ.
މިމައްސަލައާއި ގުޅިގެން "މެންދުރު އެމްވީ" ގައި ދޮގު މައުލޫމާތު ހިމަނާފައިވާ ކަމަށާއި ބިދޭސީ އަންހެންމީހާގެ ފޮޓޯވެސް އޭނަގެ ހުއްދަ ނެތި ބޭނުން ކޮށްފައިވާކަމަށް ބިދޭސީމީހާއާއި ހަވާލާދީ އަޒްމާ ވިދާޅުވިއެވެ.
މިކަމާއި ގުޅިގެން "އަނިޔާ ލިބިފައިވާ ފަރާތް" ހިއްސާ ކޮށްފައިނުވާ މައުލޫމާތެއް "މެންދުރު އެމްވީ" ގައި ޝާއިއު ކުރުމުން އެމައްސަލަ ދަނީ ތަހުގީގު ކުރަމުން ކަމަށް ވެސް އަޒްމާ ވިދާޅުވިއެވެ.
"ވިކްޓިމް ސަޕޯޓަށް ސައިކޯ ސޯޝަލް ސަޕޯޓް ދިނުމަށް ޖެންޑާ މިނިސްޓްރީއަށް ރިފާރ ކުރެވި މީގެއިތުރުން މިމައްސަލަ މިހާރު ދަނީ ޕްރޮސެކިއުޓާ ޖެނެރަލްގެ އޮފީހާއި މަޝްވަރާ ކުރެވެމުން" އަޒްމާ ވިދާޅުވިއެވެ.
