ސަފާރީގައި ޖިންސީ ގޯނާގެ ޝީކާރައަކަށްވި މީހާގެ ފޯން ހޯދައި، 11 މީހެއްގެ ބަޔާން ނަގައިފި
ހުޅުމާލޭ ފަޅުތެރޭގައި އަޅާފައި އޮތް ސަފާރީގައި ބިދޭސީ އަންހެނަކަށް ޖިންސީ ގޯނާކުރި މައްސަލައިގައި އެ އަންހެން މީހާގެ ފޯނު ހޯދައި، 11 މީހެއްގެ ބަޔާން ނަގާފައިވާ ކަމަށް ފުލުހުން ބުނެފިއެވެ.
މިހާރު ކުރިއަށްދާ ނޫސްވެރިންގެ ބައްދަލުވުމުގައި ޗީފް އިންސްޕެކްޓަރ އޮފް ޕޮލިސް މަރިޔަމް އަޒްމާ ވިދާޅުވީ މިމައްސަލައިގައި ތަހުގީގަށް ބޭނުންވާ މައުލޫމާތުތައް އެއްކުރެވިފައިވާ ކަމަށާއި މިމައްސަލައިގައި މިހާތަނަށް 11 ފަރާތެއްގެ ބަޔާން ނެގިފައިވާ ކަމަށެވެ.
މީގެއިތުރުން ފުލުހުންގެ ފޮރެންސިކް ޑައިވިންގ ޓީމުން ސަފާރީ އަޅާފައި އޮތް ސަރަަހައްދަށް ޑައިވްކޮށް، ބިދޭސީ އަންހެން މީހާގެ ފޯނު ހޯދިފައިވާ ކަމަށް ވެސް އަޒްމާ ވިދާޅުވިއެވެ.
މީގެއިތުރުން މިމައްސަލައާއި ގުޅިގެން "އަނިޔާ ލިބިފައިވާ ފަރާތް" ހިއްސާ ކޮށްފައިނުވާ މައުލޫމާތެއް "މެންދުރު އެމްވީ" ގައި ޝާއިއު ކުރުމުން އެމައްސަލަ ދަނީ ތަހުގީގު ކުރަމުން ކަމަށް ވެސް އަޒްމާ ވިދާޅުވިއެވެ.
"ވިކްޓިމް ސަޕޯޓަށް ސައިކޯ ސޯޝަލް ސަޕޯޓް ދިނުމަށް ޖެންޑާ މިނިސްޓްރީއަށް ރިފާރ ކުރެވި މީގެއިތުރުން މިމައްސަލަ މިހާރު ދަނީ ޕްރޮސެކިއުޓާ ޖެނެރަލްގެ އޮފީހާއި މަޝްވަރާ ކުރެވެމުން" އަޒްމާ ވިދާޅުވިއެވެ.
