ރިޔާސީ ކެންޑިޑޭޓުކަން ހޯދުމަށް އެއްވެސް ޝައުގުވެރިކަމެއް ނެތް، ޓިކެޓު ދިނަސް ގަބޫލެއް ނުކުރާނަން: އަދުރޭ
ދެން އެންމެ އަވަހަށް އޮންނަ ރިޔާސީ އިންތިހާބުގައި އިދިކޮޅު ކޯލިޝަނުންގެ ކެންޑިޑޭޓުކަން ހޯދުމަށް އެއްވެސް ޝައުގުވެރިކަމެއް ނެތް ކަމަށާއި ޓިކެޓު ދިނަސް ގަބޫލު ނުކުރައްވާނެ ކަމަށް ޕީއެންސީގެ ރައީސް އަބްދުއްރަހީމް އަބްދުﷲ ވިދާޅުވެއްޖެ އެވެ.
"ސީއެންއެން"ގެ އިތުރުކާފު ޕްރޮގްރާމްގައި ބައިވެރިވެވަޑައިގެން ވާހަކަ ދައްކަވަމުން އަދުރޭ ވިދާޅުވީ އިދިކޮޅުން އޭނާ އަށް ރިޔާސީ ޓިކެޓް ދިން ނަމަވެސް ގަބޫލު ނުކުރައްވާނެ ކަމަށާއި އެކަމާ ދެކޮޅު ހައްދަވާނެ ކަމަށެވެ.
"ރިޔާސީ ކެންޑިޑޭޓެއްގެ ގޮތުގައި ނުނިކުންނާނަން. ދެކޮޅު ހަދާނަން. އަޅުގަނޑު މިދަންނަވަނީ އަޅުގަނޑުގެ އެއްވެސް އިންޓްރެސްޓެއްވެސް ނެތޭ، ޝައުގުވެރިކަމެއްވެސް ނެތޭ، އަދި ނުވެސް ނުކުންނާނަމޭ. ޕީޕީއެމް-ޕީއެންސީގެ ރިޔާސީ ކެންޑިޑޭޓަކަށް އަޅުގަނޑު ނުނިކުންނާނަމޭ،" އަދުރޭ ވިދާޅުވިއެވެ.
ރައީސް އަބްދުﷲ ޔާމީނަށް ކުރިއަށް އޮތް ރިޔާސީ އިންތިހާބުގައި ވާދަ ނުކުރެވޭ ގޮތް ވެއްޖެ ނަމަ، ކޯލިޝަންގެ ރިޔާސީ ކެންޑިޑޭޓެއްގެ ގޮތުގައި އިންތިހާބުގައި ވާދަ ކުރައްވާފާނަންތޯ ސުވާލު ކުރެއްވުމުން އަދުރޭ ވިދާޅުވީ، އެމަނިކުފާނަށް އިންތިހާބުގައި ވާދަ ނުކުރެވޭނެ ހާލަތެއް ނާންނާނެ ކަމަށެވެ.
އަދުރޭ ވިދާޅުވީ، އެއީ ކޯލިޝަން ބައިބައި ކުރުމަށް ސަރުކާރުން ދޮގު ހަދައިގެން ގިނަ ވާހަކަތަކެއް ދައްކާ ކަމަށާއި ޕީޕިއެމް/ޕީއެންސީ ކޯލިޝަނުން އެންމެ އިސްކަމެއް ދީގެން ކުރާ ކަމަކީ، ރައީސް ޔާމީން މިނިވަން ކުރުން ކަމަށެވެ
