އެމްއާރުއެމްގެ ފާޑުކިޔުން މަޖިލީހަށް: ގާނޫނުތައް އިސްލާހުކުރުމުގެ ޒިންމާ ފުރިހަމައަށް އަދައެއް ނުކުރޭ
ރައްޔިތުންގެ މަޖިލީހުން އެ މަޖިލީހުގެ ޒިންމާ ފުރިހަމަ ގޮތުގައި އަދާކުރަމުން ނުދާ ކަމަށް މޯލްޑިވްސް ރިފޯމް މޫވްމަންޓް (އެމްއާރްއެމް) އިން ބުނެފި އެވެ.
އެމްއާރްއެމްއިން ނެރުނު ބަޔާނެއްގައި ވަނީ އެއްވެ އުޅުމުގެ ހައްގު ހަނިވާ ގޮތަށް އަށާރަ ވަނަ ރައްޔިތުންގެ މަޖިލީހުން އެއްވެ އުޅުމުގެ ގާނޫނަށް ގެނައި ބަދަލު އުވާނުލައި ރައްޔިތުންގެ މަޖިލީހުގައި އެ ގާނޫނަށް އިސްލާހު ގެނައުމުގެ ބިލްގެ މަސައްކަތް ލަސްވަމުންދާތީ ކަންބޮޑުވުން ފާޅުކޮށްފައެވެ.
އަދި ހުއްދަ ހޯދުމެއް ނެތި މާލޭގައި މުޒާހަރާ ކުރެވޭނީ ހޯމް މިނިސްޓްރީން ކަނޑައަޅާ ތަންތަނުގައި އެކަނި ކަމަށް ގާނޫނުގައި ކަނޑައަޅާފައިވާތީ އެކަން ހޯމް މިނިސްޓްރީން ދާދިފަހުން ހަނދާންކޮށްދިން ހަނދާންކޮށްދިނުމަށްވެސް އެޕާޓީން ވަނީ ފާޑުކިޔާފައެވެ.
އެމްއާރުއެމްގެ ބަޔާނުގައި ބުނެފައިވަނީ ސުލްހަވެރިކަމާއެކު އެއްވެ އުޅުމުގެ ގާނޫނަށް 2016 ވަނަ އަހަރު ގެނެވުނު އިސްލާހަކީ އެޕާޓީން ގަބޫލުކުރާ އުސޫލުތަކާ ހިލާފު އަދި ގާނޫނު އަސާސީއާއި ތައާރުޒުވާ އިސްލާހެއް ކަމަށެވެ.
"2016 ވަނަ އަހަރު ގެނެވުނު އިޞްލާޙަކީ އެމްއާރްއެމް އިން ޤަބޫލުކުރާ އުޞޫލުތަކާ ޚިލާފު އަދި ޤާނޫނު އަސާސީއާއި ތަޢާރުޒުވާ އިސްލާޙެކެވެ. އަދިމިއީ ޤާނޫނުއަސާސީން ދީފައިވާ ޙައްޤެއް އުނިކުރުމަށް ކޮށްފައިވާ ކަމެކެވެ. އެހެންކަމުން، މިކަމާ ދެކޮޅަށް އޭރުވެސް އަޅުގަނޑުމެން ވާނީ ފާޅުގައި ވަކާލާތު ކޮށްފައެވެ. ހަމައެއާއެކު މިކަމާ ދެކޮޅަށް ތެދުވެ ވަޑައިގެންނެވި ރައްޔިތުންގެ މަޖިލީހުގެ އެތައް މެންބަރެއްގެ ގޮނޑިތައް ގެއްލިގެން ދިޔަކަމީވެސް ރައްޔިތުން ދަންނަ ހަޤީޤަތެކެވެ." ބަޔާނުގައި ވެއެވެ.
އެމްއާރުއެމްއިން ބުނީ ގާނޫނުއަސާސީގެ ރޫހާ ހިލާފަށް އޭރުގެ ސަރުކާރުން ގެނެސްފައިވާ ބަދަލުތައް މުރާޖާކޮށް ރައްޔިތުންނަށް ގެއްލުންވާ ގޮތަށް އަދި ކޮރަޕްޝަނަށް މަގުފަހިވާގޮތަށް ގާނޫނުއަސާސީއަށް ގެނެސްފައިވާ ބަދަލުތައް އިސްލާހު ކުރުމަށް އިސްލާހީ މަސައްކަތުގައި ބައިވެރިވި ހުރިހާ ފަރާތްތަކުންވެސް އެއްބަސްވެފައިވާ ކަމަށެވެ.
"މިކަން މިހެން އޮތް ނަމަވެސް މިއަދު އަޅުގަނޑުމެންނަށް ފެނިގެން މިދަނީ އަޅުގަނޑުމެން އެންމެން ތާއީދު ކޮށްގެން ގެނައި ސަރުކާރުގެ ހޯމް މިނިސްޓްރީން ކުރީގައި އަޅުގަނޑުމެން ބަދަލުކުރަން ޖެހޭކަމަށް އެއްބަސްވި ޤާނޫނުގެ ދަށުން ރައްޔިތުންނަށް ލިބިދީފައިވާ ޙައްޤެއް ހަނިކުރެވިގެންދާ މަންޒަރެވެ. މިގޮތަށް މަސައްކަތްތައް ކުރުމުގެ ފުރުޞަތު ލިބިގެން މިދަނީ، ޤާނޫނުތައް ހެދުމާއި، ޤާނޫނުތައް އިސްލާހުކުރުމުގެ ޒިންމާ ހަވާލުކުރެވިފައި ތިއްބެވި ފަރާތްތަކުން ފުރިހަމަ ގޮތުގައި އެޒިންމާ އަދާކުރެވިފައި ނުވާތީ ކަމަށް ރައްޔިތުން މިއަދު ޤަބޫލުކުރާނެއެވެ." އެމްއާރުއެމް އިން ބުންޏެވެ.
ރައްޔިތުންނަށް ރައްޔިތުންގެ ބާރު ލިބުނުކަމަށް ވާނީ ރައްޔިތުންނާ ގުޅުންހުރި ޤާނޫނުތައް ބަދަލުކުރެވި، ޤާނޫނުއަސާސީއާ އެއްގޮތަށް ޢަމަލުކުރެވި، ޤާނޫނުއަސާސީން ރައްޔިތުންނަށް އިންސާފު ލިބުމުން ކަމަށް އެ ޕާޓީން ދެކެއެވެ.
އެހެންކަމުން، ރައްޔިތުންނަށް ވެފައިވާ ވަޢުދާ އެއްގޮތަށް ޤާނޫނުތައް އިޞްލާޙުކޮށްދެއްވާނެ ކަމަށް ވިދާޅުވެފައިވާ ޤާނޫނުތައް އަވަހަށް އިޞްލާޙުކޮށްދެއްވުމަށް ރައްޔިތުންގެ މަޖިލީހަށް އެމްއާރްއެމް އިން ވަނީ ގޮވާލާފައެވެ.
