އެމްއެމްޕީއާރުސީގެ މައްސަލަ ބެލޭނެ ފަދަ މާހައުލެއް ހޯދައިދެއްވާ: ޕީޖީ ވަކީލުން
އެމްއެމްޕީއާރުސީ މައްސަލައިގެ އެންމެ ފުނަށް ގޮސް މައްސަލަ ބެލޭނެ ފަދަ މާހައުލެއް މިވަގުތު ރާއްޖޭގައި ނެތް ކަމަށް ބުނެ އެފަދަ މާހައުލެއް ގާއިމު ކޮށްދިނުމަށް ޕްރޮސިކިއުޓަރުންގެ ޓީމުން ރައީސް އިބްރާހިމް މުހައްމަދު ސޯލިހުގެ އަރިހުގައި ދަންނަވައިފި އެވެ.
އެސެޓް ރިކަވަރީ ކޮމިޝަނާއި އޭސީސީ، ފުލުހުން ގުޅިގެން ހިންގާ އެ ތަހުގީގުގައި ޕީޖީގެ އޮފީހުގެ ފަރާތުން ހަރަކާތްތެރިވާ ޕްރޮސިކިއުޓަރުންގެ ޓީމުން ސޮއިކޮށް އިއްޔެ ރައީސް ސޯލިހުއަށް ފޮނުއްވި ސިޓީއެއްގައި ވިދާޅުވެފައި ވަނީ، އެމްއެމްޕީއާރުސީ މެދުވެރިކޮށް ހިންގާފައިވާ ހިޔާނާތާއި ކޮރަޕްޝަނާއި މަނީ ލޯންޑަރިންގެ އަމަލުތަކާ ގުޅޭ ޖިނާއީ ތަހުގީގުތަކަކީ 2015 ވަނަ އަހަރުން ފެށިގެން ކުރިއަށްގެންދާ ތަހުގީގުތަކަކަށް ވާއިރު، މި މައްސަލައިގެ ތަހުގީގާ، ދައުވާ ކުރުމާއި ޝަރީއަތުގެ މަރުހަލާތަކާމެދު އާންމުންގެ ގިނަ ބައެއްގެ ސުވާލުތަކެއް އަދިވެސް އުފެދިފައިވާ ކަމަށެވެ.
ސިޓީގައި ބުނިގޮތުގައި، ޕްރޮސެކިއުޓާ ޖެނެރަލްގެ އޮފީހުން އޮގަސްޓް 7، 2019 ގައި ހާއްސަ ޓީމެއް އެކުލަވާލައިގެން ތަހުގީގުގެ މަސައްކަތް ވަނީ ފަށައިފަ އެވެ. ނަމަވެސް އެކަން ހުއްޓުވުމަށާއި ޝަރީއަތްތައް އެންމެ އެކަށީގެންވާ ގޮތެއްގައި ކުރިއަށް ގެންދިއުމަށް ހުރަސް އަޅަމުންގެންދާ ކަމަށް ސިޓީގައި ވެ އެވެ.
"ނަމަވެސް ހިތާމައަކީ އަޅުގަނޑުމެންގެ މަސައްކަތުގެ ނަތީޖާ ހާސިލްވިޔަނުދިނުމަށްޓަކައި އެކި ފަރާތްތަކުން މަސައްކަތް ކުރަމުންގެންދާ ކަމެވެ. މިކަންކަން ހުއްޓުވުމަށާއި، ޝަރީއަތްތައް އެންމެ އެކަށީގެންވާ ގޮތެއްގައި ކުރިއަށް ގެންދިއުމަށް ހުރަސްއަޅަމުން ގެންދާކަމެވެ." ސިޓީގައިވެ އެވެ.
އެގޮތުން ޕްރޮސިކިއުޓަރުންގެ ސިޓީގައި ވިދާޅުވެފައި ވަނީ ރިޔާސީ ކޮމިޝަނާއި ތަހުގީގީ އިދާރާތައް ގާއިމްވެފައި ހުރި ނަމަަވެސް، އެ މުއައްސަސާތަކަށް ބޮޑު ހިޔާނާތުގެ ތަހުގީގު އެންމެ އެކަށޭނަ ގޮތުގައި ކުރެވޭނެ ވަސީލަތްތައް ދައުލަތުން ފޯރުކޮށްދީފައި ނުވާކަމަށެވެ. އެފަދަ މާހައުލެއް ގާއިމްކޮށް، މަސައްކަތް އިތުރަށް ހަރުދަނާ ކުރުމަށް ކުރެވިދާނެ ކަން ކަން ވެސް ސިޓީގައި ބަޔާންކޮށްފައި ވެއެވެ.
