އިމިގްރޭޝަން ގާނޫނުގެ އިސްލާހަކީ ދިވެހި ގައުމިއްޔަތު ނައްތާލަން ރާވާ ރޭވުމެއް: ޖަމީލް
އިމިގްރޭޝަން ގާނޫނުގެ އިސްލާހަކީ ދިވެހި ގައުމިއްޔަތު ނައްތާލަން ރާވާ ރޭވުމެއް ކަމަށް ކުރީގެ ނައިބް ރައީސް އަދި އިދިކޮޅު ޕީޕީއެމްގެ ހާއްސަ އެޑްވައިޒަރު ޑރ. މުހައްމަދު ޖަމީލް އަހުމަދު ވިދާޅުވެއްޖެއެވެ.
ޖަމީލް މިހެން ވިދާޅުވީ ރާއްޖޭގައި 10 އަހަރަށް ވުރެ ދިގު މުއްދަތަށް ގެއެއް ކުއްޔަށް ހިފާ ބިދޭސީންނަށް ރެޒިޑެންޓް ވިސާ ދޭ ގޮތަށް އިމިގްރޭޝަންގެ ގާނޫނަށް އިސްލާހު ގެންނަން ރައްޔިތުންގެ މަޖިލީހުގެ ރައީސް މުހައްމަދު ނަޝީދު އެދިވަޑައިގެންނެވުމާ ގުޅިގެންނެވެ.
އެގޮތުން ޖަމީލް ކުރެއްވި ޓްވީޓެއްގައި ވިދާޅުވީ މިއި ގައުމުގެ ހުރިހާ ލީޑަރުން އެކުގައި ތެދުވަންޖެހޭ ކަމެއް ކަމަށާއި މިހާ ފަސޭހައިން މިކަން ދޫކޮށްލައިފި ނަމަ މާދަމާ ދިވެހި ރާއްޖެ ކިޔާ ތަނެއް ނޯންނާނެ ކަމަށެވެ.
"އަބަދު ދިވެހިންނަށް ގެއްލުންދޭން ރާވަނީ ކީއްވެބާ؟" ޖަމީލް ސުވާލު ކުރެއްވިއެވެ.
Immigration Qaanoon ge islaah akee Dhivehi Qawmiyyathu nahthaalan ravaa reyvumeh.Miee Qawm ge hurihaa leaderun ekugai thedhuvaan jehey kameh.Mihaa faseykoh mikan dhookohfinama maadhamaa Dhivehi Raajje kiyaane thaneh noannaane. Abadhu Dhivehinnah gehllun dheyn raavanee keeve ba? https://t.co/rQfM5gj5xA
— Mohamed Jameel Ahmed (@MJameelAhmed) July 17, 2020
މަޖިލީހުގެ ގައުމީ ސަލާމަތާއި ޚާރިޖީ ގުޅުންތަކާ ބެހޭ ކޮމިޓީގައި ނަޝީދު އެދިވަޑައިގަތީ 10 އަހަރަށް ވުރެ ދިގު މުއްދަތަކަށް ގެއެއް ކުއްޔަށް ހިފާ ބިދޭސީންނަށާއި އެއް ލައްކަ ރުފިޔާ އަށް ވުރެ ބޮޑު އިންވެސްޓްމަންޓެއް ރާއްޖޭގައި ކުރާ ބިދޭސީންނަށް ވެސް ރެސިޑެންޓް ވިސާ ދޭންޖެހޭ ގޮތަށް ވެސް ހަމަޖައްސައި ދިނުމަށެވެ.
މި މައްސަލައިގައި ނަޝީދަށް އެތައް ބައެއްގެ ފާޑުކިޔުމާއި ނުރުހުން އަންނަނީ އަމާޒުވަމުންނެވެ.
