މަސްދޯންޏެއް އަޑިއަށް ގޮސް، 9 މީހުން ކަނޑުވެއްޖެ
މޫސުން ގޯސްވެ، ކަނޑު ގަދަވުމުން މަސްދޯންޏެއް އަޑިއަށް ގޮސް، ފަޅުވެރިން ކަނޑުވެފައި ތިއްބާ މިއަދު ހެނދުނު ސަލާމަތް ކޮށްފިއެވެ.
އެމްއެންޑީއެފް ވިދާޅުވީ ނުވަ މީހުންނާއި އެކު މާލެ އާއި 17 ނޯޓިކަލް މޭލު އިރުން ހުރާ ބޮއެ ކައިރީ މަސްވެރިކަން ކުރަން އުޅުނު "ކަނޑުރޯދި-01" ނަމަކަށް ކިޔާ ދޯންޏެއް މޫސުން ގޯސްވެ ކަނޑު ގަދަވެ، ދޯނި އަޑިއަށް ގޮސް ފަޅުވެރިން ކަނޑުވެފައި ތިއްބާ އެސަރަހައްދުން ދަތުރު ކުރި އެހެން ދޯންޏަކަށް ނަގާފައިވާ ކަމަށެވެ.
އަދި މި ސަރަހައްދުގައި އެމްއެންޑީއެފް ކޯސްޓްގާޑްގެ ސިފައިން ހަރަކާތްތެރިވަމުންދާ ކަން ވެސް ފާހަގަކުރެއްވިއެވެ.
މިހާދިސާ ރިޕޯޓުކޮށްފައިވަނީ މިއަދު ހެނދުނު 06:30 ހާއިރުއެވެ. ކަނޑުވި ދޯނީގެ ފަޅުވެރިން ނަގައިގެން ދޯނި މިހާރު ދަނީ މާލެ އަށް ދަތުރުކުރަމުންނެވެ.
މޫސުން ގޯސްވުމުން މިހާރުވެސް ރާއްޖޭގެ ބޮޑު ސަރަހައްދަކަށް ވަނީ ހުދު ސަމާލު (ވައިޓް އެލާޓް) ނެރެފައެވެ. ކުރިއަށް އޮތް 24 ގަޑިއިރު ވެސް ރާއްޖޭގެ ބޮޑު ބަޔަކަށް ވިއްސާރަކުރާނެ ކަމަށާއި އަދި ބައެއް ރަށްތަކަށް ގުގުރުމާއެކު ބޯކޮށް ވާރޭ ވެހޭނެ ކަމަށް ލަފާކުރެވޭ ކަމަށް މޫސުމާއި ބެހޭ ގައުމީ އިދާރާ އިން ވިދާޅުވެއެވެ.
