ބޮޑުފިނޮޅުގައި ބިދޭސީންނަށް ބިރުދެއްކި މައްސަލަ ބަލައިދޭން އެދިއްޖެ
ބ. ބޮޑުފިނޮޅުގައި ހަމަނުޖެހުން ހިންގާ ހައްޔަރުކުރި 19 ބިދޭސީންނަށް ބިރުދެއްކި މައްސަލަ ބަލައިދިނުމަށް އެބިދޭސީން ތަމްސީލުކުރާ ވަކީލުން އެދިއްޖެއެވެ.
ބިދޭސީންނަށް ބިރު ދައްކާ ހައްޔަރު ކުރި މައްސަލައާއި ގުޅޭގޮތުން ވަަކީލުން ނެރުނު ނޫސްބަޔާނެއްގައި ބުނެފައިވަނީ ހަމަނުޖެހުން ހިންގަން ބިދޭސީންނަށް ހިތްވަރު ލިބުނީ އެމީހުންނަށް ބިރު ދައްކާ ހެދުމުން ކަމަށާއި، ހައްޔަރު ކުރި 19 ބިދޭސިންނަކީ ސީލް މޯލްޑިވްސް އިން ބިރު ދެއްކި 19 ބިދޭސީ އެއް ކަމަށެވެ.
މީގެއިތުރުން އެބަޔާނުގައި ބުނެފައިވަނީ ބޮޑުފިނޮޅުގައި ހަމަނުޖެހުން ހިންގި ކަމުގެ ތުހުމަތުގައި ހައްޔަރު ކުރި ބިދޭސީން ހައްޔަރު ކުރި ގޮތާއި، މުއްދަތު އިތުރު ކުރި ގޮތާއި، އެ ހާދިސާ ހިނގި ގޮތް އޮޅުން ފިލުވުމަށް ގާނޫނީ ވަކީލުންގެ ޓީމުން ބިދޭސިންނާއި ވަކިވަކިން ބައްދަލުކޮށް މައުލޫމާތު ސާފުކޮށްފައިވާ ކަމަށެވެ.
މިމައްސަލައާއި ގުޅޭ މައުލޫމާތު ސިއްރު ކުރުމަށް ފުލުހުން މަސައްކަތް ކުރަމުންދާ ކަމަށް ޝަައްކު ކުރެވޭ ކަމަށް ވެސް ވަކީލުންގެ ބަޔާނުގައިވެއެވެ.
ބޮޑުފިނޮޅުގައި ބިދޭސީން ހަމަނުޖެހުން ހިންގާފައިވަނީ މިމަހުގެ ދެވަނަ ދުވަހުގައެވެ. މިކަމާއި ގުޅިގެން 19 ބިދޭސީއަކު ހައްޔަރު ކޮށްފައިވަނީ ޖެހިގެން އައި ދުވަހުއެވެ.
