ޝާހު ގެއްލުނުތާ 24 ގަޑިއިރު: ދަތުރު ފެށީ އަމިއްލަ އާއިލާ ކައިރިއަށް ދާން!
އާއިލާ މެމްބަރަކު ވީނުވީއެއް ނޭނގި ގެއްލުމަކީ ކިހާވަރެއްގެ ހިތާމައެއް ލިބޭކަމެއްކަން އެންމެ ބޮޑަށް ވިސްނޭނީ އެކަން ތަޙައްމަލު ކުރަމުންދާ ބަޔަކަށެވެ.
މާލެއިން ފުރައިގެން އދ. މަންދޫ އަށް ދިޔަ "ރަންތަރި" ނަމަކަށް ކިޔާ ދޯނިން އިއްޔެ ރޭ މެންދަމު ގެއްލުނު އެރަށު ރަންތަރި، އަލީ ޝާހް (27އ.) ގެއްލުނުތާ މިހާރު މިވަނީ 24 ގަޑިއިރަށްވުރެ ގިނައިރު ވެފައެވެ.
ޝާހު ގެއްލިގެން އެމްއެންޑީއެފް އަށް ރިޕޯޓު ކޮށްފައިވަނީ ބުރާސްފަތި ދުވަހުގެ މެންދަމު 2:10 ހާއިރެވެ.
ދޯނީގެ ކެޕްޓަނާއި ހަވާލާދީ އެމްއެންޑީއެފް އިން ބުނެފައިވަނީ ޝާހު ގެއްލިގެން ރިޕޯޓު ކޮށްފައިވަނީ ދޯނީގައި އޭނާ ނެތްކަން އެނގުނުތާ ގަޑިއިރެއްވަރު ފަހުންނެވެ.
ޝާހު ހޯދުމަށް އެމްއެންޑީއެފް ގެ ކޯސްޓްގާޑު ޑައިވަރުންނާއި މަންދޫގެ ދޯނިތައް ނެރެގެން ވެސް ވަނީ ވަރަށް ގިނަ މަސައްކަތްތަކެއް ކޮށްފައެވެ. އަދި އެހެނިހެން ފަރާތްތަކުން ވެސް ޝާހު ހޯދުމުގެ މަސައްކަތުގައި ބައިވެރިވެފައިވެއެވެ.
ފަސް މެމްބަރުން ތިބޭ އާއިލާއެއްގައި ޝާހު އަކީ ހަތަރުވަނައަށް ހުންނަ ކުއްޖާއެވެ.
އެނގިފައިވާ ގޮތުގައި އޭނާއަކީ ފަތުރުވެެރިކަމުގެ ދާއިރާއަށް ޝާހު ވަރަށް ޝައުޤުވެރިކަން ހުރެއެވެ. އެގޮތުން އާމްދަނީ ހޯދުމަށް ޝާހު ވަނީ ގެސްޓް ހައުސް އާއި ރިސޯޓުތަކުގައި ވެސް މަސައްކަތް ކޮށްފައެވެ.
މާލެ ސަރަހައްދަށް އިއުލާންކޮށްފައިވާ ފުރަ ބަންދުގައި ތާށިވެފައި ހުރުމަށްފަހު އެރޭ ޝާހު ދަތުރުފެށީ އަމިއްލަ ރަށަށް ދިޔުމަށެވެ.
އެނގިފައިވާ ގޮތުގައި ޝާހުގެ އާއިލާ މީގެ ކުރިން ދިރިއުޅެމުންދިޔައީ މާފުށީގައެވެ. ނަމަވެސް ކޮވިޑް ގެ ހާލަތާއި ގުޅިގެން އެއާއިލާ ވަނީ ރަށަށް ބަދަލުވެފައެވެ.
ޝާހު ގެއްލިފައިވަނީ މަންދޫއަށް ދާން ފެށި ދަތުރުގައި، ްއެރަށުގެ ފަޅަށްވެސް ވަން ފަހުންނެވެ. އޭނާ ރަށަށް ދާން ދަތުރުފެށީ ރަށުގައި ހޯމް ކަރަންޓީނުގައި ހުރުމަށެވެ.
ޝާހުގެ އާއިލާއާއި އެންމެހާ ރައްޔިތުން ތިބީ އޭނާ ފެންނާނެ ކަމުގެ އުންމީދުގައެވެ. އަޅުގަނޑުމެންގެ އުންމީދަކީ ވެސް ޝާހު ފުރިހަމަ ރަނގަޅު ސިއްޙަތުގައި ފެނުމެވެ.
