ބޮޑު ފިނޮޅުން ހައްޔަރުކުރި ބިދޭސީންގެ ބަންދަށް އަނެއްކާވެސް 15 ދުވަސް
ބ. ބޮޑުފިނޮޅުގައި ހަމަނުޖެހުން ހިންގައި، ހައްޔަރު ކުރި ބިދޭސީންގެ ބަންދުގެ މުއްދަތަށް އަނެއްކާވެސް 15 ދުވަސް ޖަހައިފިއެވެ.
ފުލުހުންގެ މީޑިއާ އޮފިޝަލު ވިދާޅުވީ ބޮޑުފިނޮޅުގައި ހަމަނުޖެހުން ހިންގައިގެން 3 ޖުލައި ވަނަ ދުވަހު ބޮޑު ފިނޮޅުން ހައްޔަރު ކުރި 19 މީހުންގެ ބަންދުގެ މުއްދަތު ދެވަނަ ފަހަރަށް އިތުރު ކުރުމަށް ކްރިމިނަލް ކޯޓަށް ހާޒިރު ކުރުމުން މިނިސްޓްރީ އޮފް ހޯމް އެފެއާޒުން ކަނޑައަޅާ ތަނެއްގައި ބަންދުގައި ބައިތިއްބައިގެން ތަހުގީގު ކުރިއަށް ގެންދިޔުމަށް 15 ދުވަހުގެ މުއްދަތެއް މިއަދު ދީފައިވާ ކަމަށެވެ.
ބޮޑުފޮނޮޅުގައި ހަމަނުޖެހުން ހިންގަން މެދުވެރިވީ ސީލް މޯލްޑިވްސްގެ މީހަކު ބިދޭސީންނަށް ބިރު ދެއްކުމުން ކަމަށާއި އެ މީހުން މުސާރަ ނުދީ ގައުމަށް ފޮނުވާލާނެ ކަމުގެ އިންޒާރު ދޭން ފެށުމުން ކަމަށް މައްސަލައިގައި ހައްޔަރުކޮށްފައިވާ ބިދޭސީއަކު ވަނީ މީގެ ކުރިން ބުނެފައެވެ.
އެހެންކަމުން ބިދޭސީންނަށް ބިރުދެއްކި މައްސަލަ ބަލައިދެއްވުމަށް އެބިދޭސީން ތަމްސީލުކުރާ ވަކީލުން މިއަދު ވަނީ ނޫސްބަޔާނެއް ނެރި އެދިލައްވާފައެވެ.
