ކުޑަހުވަދޫ ކްލަސްޓާ: ކަނޑޫދޫން ނެގި ސާމްޕަލް ނައްސި
ދ.ކުޑަހުވަދޫގައި ފެތުރެމުން އަންނަ ކްލަސްޓާއާ ގުޅިގެން، ކުޑަހުވަދޫއިން ތ.ކަނޑޫދޫއަށް ދަތުރުކުރި މީހުންގެ ތެރެއިން ހުރިހާ އެންމެން ބައްޔަށް ނައްސިވެއްޖެއެވެ.
ކުޑަހުވަދޫން ބަޔަކު ފައްސިވުމާ ގުޅިގެން އެރަށް މޮނިޓަރިން އަށްލައި، އެޗްޕީއޭއިން ވަނީ 26 ފެބްރުއަރީ ވަަނަ ދުވަހުގެ ފަހުން އެރަށަށް ދަތުރުކުރި ފަރާތްތައް ރިޕޯޓުކުރަން އަންގާފައެވެ.
ކަނޑޫދޫއިން 13 މީހަކު ކުޑަހުވަދޫއަށް ދަތުރުކޮށްފައިވާއިރު، މި 13 މީހުންގެ ސާމްޕަލް ވެސް ވަނީ ނަގާފައެވެ.
ކަނޑޫދޫ ކައުންސިލްގެ ނައިބު ރައީސް އަހައްމަދު ނަވާޒު އާ ހަވާލާދީ "ސީއެންއެމް" ނޫހުގައި ރިޕޯޓުކޮށްފައިވާ ގޮތުގައި ކަނޑޫދޫއިން ނެގި ހުރިހާ ސާމްޕަލްއެއްގެ ނަތީޖާ ލިބިފައިވާއިރު އެ އެންމެން ވެސް ވަނީ ބައްޔަށް ނައްސިވެފައެވެ.
ނަމަވެސް 10 ދުވަހުގެ ކަރަންޓީނުގެ މުއްދަތު ހަމަނުވާތީ މީގެ ތެރެއިން 9 މީހުން އަދިވެސް ތިބީ ކަރަންޓީނުގައި ކަމަށް ވެސް ނަވާޒު ވިދާޅުވިއެވެ.
ކުޑަހުވަދޫން މިހާތަނަށް 13 މީހަކު ވަނީ ކޮވިޑް-19 އަށް ފައްސިވެފައެވެ.
އެޗްއީއޯސީ އިން ބުނީ ކުޑަހުވަދޫ އެއާޕޯޓުގައި މަސައްކަތް ކުރާ ހަ މީހެއްގެ ކިބައިން ބަލީގެ އަލާމާތްތައް ފެނިގެން ނެގި ސާމްޕަލްތައް ކޮވިޑަށް ފައްސި ވެފައިވާ ކަމަށެވެ. އަދި ފައްސިވީ ކޭސްތަކާ ގުޅިގެން ކޮންޓެކްޓް ޓްރޭސިންގެ މަސައްކަތް ކުރުމަށް އެރަށް މޮނީޓަރިންގަށް ލާފައިވާ ކަމަށް ވެސް އެޗްޕީއޭއިން ބުނެފައި ވެއެވެ.
