ކޮވިޑް19: ފައްސިވީ ނަމަވެސް އެޗްޕީއޭގެ އެއްބާރުލުން ނުލިބި އާއިލާއާއެކީ އުޅޭތާ ދެދުވަސް!
ކޮވިޑް-19 އަށް ފައްސިވީ ދިވެހި އަންހެނަކު އައިސޮލޭޝަން ފެސިލީޓީއަށް ނުގެންގޮސް ، ފައްސިވީ ފަހުން އާއިލާއާއެކު އުޅޭތާ މިހާރު 48 ގަޑިއިރަށްވުރެ ގިނައިރު ވެއްޖެއެވެ.
ނަން ހާމަ ނުކުރުމަށް އެދި "ދެން" އަށް މައުލޫމާތު ދެމުން އެއަންހެން މީހާ ބުނީ އޭނާ ކޮވިޑް އަށް ޓެސްޓު ކުރީ މިމަހުގެ 15 ވަނަ ދުވަހު ކަމަށާއި އޭގެ އަނެއް ދުވަހުގެ ރޭ ނަތީޖާ ލިބުނުއިރު ކޮވިޑަށް ފައްސިކަން ހާމަވެފަައިވާ ކަމަށެވެ.
އޭނާގެ އިތުރުން އެގޭގައި އެއަންހެން މީހާގެ ފިރިމީހާ އާއި ދައްތަ އާއި ދައްތަގެ ފިރިމީހާ އުޅެއެވެ.
އަންހެންމީހާއާއި އޭނަގެ ފިރިމީހާ އުޅެނީ ކުޑަ ކޮޓަރިއެއްގައި ކަމަށާއި އެގޭގައި އޭނައަަށް ވަކިން ހުރެވޭނެ ތަންކޮޅެއް ނެތް ކަމަށް ވެސް އޭނާ ބުންޏެވެ. އަދި އެހަތަރު މީހުން ވެސް ބޭނުން ކުރަނީ އެއް ފާޚާނާ އެކެވެ.
"މިރޭ 20:25 އަށް މިވީ ދެދުވަސް. އިއްޔެވެސް ވަރަށް ގިނައިން ގުޅައިފިން އެޗްޕީއޭ އަށް. މިއަދު ވެސް ގުޅައިފިން. ހިއްސާ ކޮށްލާނަމޭ ކޮންމެ ފަހަރަކު ވެސް ބުނަނީ. ހާލަތު މެއިލް ކޮށްލަން ބުނީމަ އިއްޔެ ވެސް މެއިލް ކުރިން މިއަދު ވެސް ކުރިން. މިގޭގައި އެއް ފާޚާނާ ހުރިހާ އެންމެން ބޭނުން ކުރަން ޖެހެނީ. ފިރިމީހާ ކައިރީ އެއް ކޮޓަރިއެއްގަައި ހުންނަން މިޖެހެނީ. މިހުރިހާ ވާހަކައެއް ވެސް ހިއްސާ ކޮށްފިން" އަންހެންމީހާ ވަރަށް އަސަރާއެކު ކިޔައިދިނެވެ.
އޭނާ ބުނި ގޮތުގައި ފުރަތަމަ 24 ގަޑިއިރު ވެގެން އެޗްޕީއޭ އިން ގުޅިއެވެ. އަދިވެސް ހުންނާނެ ތަނެއް ހަމަނުޖެހޭ ވާހަކަ އާއި ނުގެންދެވިފައި ހުރީ އެހެންވެ ކަމަށް ބުނި ކަމަށް ވެސް އަންހެން މީހާ ބުންޏެވެ.
އެމީހުން މާލޭގައި ދިރިއުޅެނީ ކުއްޔަށެވެ. ލިބޭ އެއްޗަކުން އެއްޗެއް ދީގެން އުޅެނީ، އަންހެންމީހާއަކީ ކޯހެއްގައި އުޅޭ މީހަކަށް ވުމުންނެވެ.
އެޗްޕީއޭގެ ހެލްޕްލައިން ނަންބަރަށާއި ކޮންޓެކްޓް ޓްރޭސިން ހަދަން ގުޅި ނަންބަރަށް ވެސް ގުޅާފައި އޭނާ ގެންދަނީ ކޮންއިރަކުތޯ އެހި ކަމަށާއި ނަމަވެސް އެދެވޭ ޖަވާބެއް ނުލިބުނުކަމަށް އޭނާ ބުންޏެވެ.
ވަކިން އެކަހެރިވެސް ވެވެން ނެތް ތަނެއްގައި، ތިމާ ލޯބިވާ އެހެން މީހުންނާއިއެކު ކޮވިޑް ފަދަ ނުރައްކާތެރި ބައްޔަކަށް ފައްސި ހާލަތުގައި އުޅެން ޖެހުމުން ހާސްވާނެ ވަރު ވިސްނާލައްވާށެވެ.
Ads by STO
