ކޮވިޑް-19: ފްލޫ ކްލިނިކަށް ދައްކާ މީހުން ފައްސިވާލެއް ގިނަވެއްޖެ!
ފެތުރެމުން އަންނަ ކޮވިޑް-19 ގެ އަލާމާތްތައް ހުރެގެން ފްލޫ ކްލިނިކް ތަކަަށް ދައްކަންދާ މީހުން، މިބައްޔަށް ފައްސިވާލެއް ގިނަކަން ހެލްތު އެމަޖެންސީ އޮޕަރޭޝަން ސެންޓަރ (އެޗްއީއޯސީ) އިން ފާހަގަކޮށްފިއެވެ.
މިރޭ ކުރިއަށްދިޔަ ނޫސްވެރިންގެ ބައްދަލުވުމުގައި ވާހަކަދައްކަވަމުން ޑރ. އަހުމަދު ޝަހީދު ވިދާޅުވީ ފްލޫގެ ނިޝާންތަކެއް ހުރެގެން ފްލޫ ކްލިނިކަށް ދައްކައިގެން ޓެސްޓް ކުރާ ސާމްޕަލްތަކުގެ ތެރެއިން އާންމުކޮށް ފައްސިވަނީ ފަސް ޕަސެންޓް ކަމަށެވެ.
ނަމަވެސް ނިމިދިޔަ ހަފްތާގައި އެ އަދަދު ނުވަ ޕަސެންޓަށް މައްޗަށް ގޮސްފައިވާ ކަމަށް ވެސް ޑރ. ޝަހީދު ވިދާޅުވިއެވެ.
"ނިމިގެން ދިޔަ ހަފްތާގެ ސްޓެޓިސްޓިކްސްތަކަށް ބަލާލައިފިއްޔާ އަޅުގަނޑުމެންނަށް ފާހަގަ އެބަކުރެވޭ ފުލޫ ކްލިނިކުތަކުން ނަގާ ސާމްޕަލްތަކުން ޕޮސިޓިވްސް ފެންނަ އަދަދު މިވަނީ މައްޗަށް ގޮސްފައި ކުރީގެ ހަފްތާތަކާ އަޅާ ބަލާ." ޑރ. ޝަހީދު ވިދާޅުވި އެވެ.
މީގެއިތުރުން ޑރ. ޝަހީދު ވިދާޅުވީ ފްލޫ ކްލިނިކްތަކަށް ދައްކައިގެން ފައްސިވާ ރޭންޖު މީގެ ކުރީ ހަފްތާތަކުގައި އެވަރެޖްކޮށް އުޅެނީ ފަސް ޕަސެންޓު ވަރުގައި ކަމަށެވެ. އެހެންނަމަވެސް ނިމިގެން ދިޔަ ހަފްތާގައި އެ އަދަދު ވަނީ ނުވަ ޕަސެންޓަށް މައްޗަށް ގޮސްފައި ކަމަށް ޑރ. ޝަހީދު ވިދާޅުވިއެވެ.
ޖުލައި މަހުގެ އަށް ވަނަ ދުވަހުން ފެށިގެން 14 ވަނަ ދުވަހާ ހަމައަށް 891 ސާމްޕަލެއް ފުލޫ ކްލިނިކްތަކުން ނަގާފައިވާއިރު އޭގެ ތެރެއިން 76 ސާމްޕަލް ވަނީ ފައްސިވެފަ އެވެ. އެޗްއީއޯސީއިން އިރުޝާދު ދެނީ ކިރިޔާވެސް ކޮވިޑްގެ އަލާމާތެއް ހުރި ނަމަ ފުލޫ ކްލިނިކަށް ދެއްކުމަށެވެ.
