ނަޝީދުގެ ރެޒިޑެންސް ވިސާގެ އިސްލާހާ ރޮޒެއިނާ ދެކޮޅު!
ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދު އިމިގްރޭޝަންގެ ގާނޫނަށް ހުށަހެޅުއްވި އިސްލާހަށް އައްޑޫ މީދޫ ދާއިރާގެ މެމްބަރު ރޮޒެއިނާ އާދަމް ދެކޮޅު ހައްދަވައިފިއެވެ.
ނަޝީދު ހުށަހެޅުއްވީ 10 އަހަރަށް ވުރެ ދިގު މުއްދަތަށް ގެއެއް ކުއްޔަށް ހިފާ ބިދޭސީންނަށް ރެޒިޑެންޓް ވިސާ ދޭ ގޮތަށް އިމިގްރޭޝަންގެ ގާނޫނަށް އިސްލާހު ގެންނަންށެވެ.
މިކަމާ ގުޅިގެން ރޮޒެއިނާ ކުރެއްވި ޓްވީޓެއްގައި ވިދާޅުވީ އެއް ލައްކަ ރުފިޔާގެ އިންވެސްޓްމެންޓަކާއެކު ރެސިޑެންސް ވިސާ ދިނުމަށް އޭނާ ދެކޮޅު ކަމަށެވެ. އަދި ރަނގަޅު ބޮޑު އިންވެސްޓްމެންޓެއް ގެނައުމުން ނޫނީ ރެސިޑެންސް ވިސާ ދެވިގެން ނުވާނެ ކަމަށްވެސް ރޮޒެއިނާ ވިދާޅުވިއެވެ.
"ގެއެއް ކުއްޔަށް ހިފާލާ އިރަށް ރެސިޑެންޓް އަކަށް ވާކަށް ނުޖެހޭ. ގަބޫލު ކުރެވޭ ކަމެއް ނޫން މިއީ" ރޮޒެއިނާ ވިދާޅުވިއެވެ.
މަޖިލީހުގެ ގައުމީ ސަލާމަތާއި ޚާރިޖީ ގުޅުންތަކާ ބެހޭ ކޮމިޓީގައި ނަޝީދު އެދިވަޑައިގަތީ 10 އަހަރަށް ވުރެ ދިގު މުއްދަތަކަށް ގެއެއް ކުއްޔަށް ހިފާ ބިދޭސީންނަށާއި އެއް ލައްކަ ރުފިޔާ އަށް ވުރެ ބޮޑު އިންވެސްޓްމަންޓެއް ރާއްޖޭގައި ކުރާ ބިދޭސީންނަށް ވެސް ރެސިޑެންޓް ވިސާ ދޭންޖެހޭ ގޮތަށް ވެސް ހަމަޖައްސައި ދިނުމަށެވެ.
އިމިގްރޭޝަން ގާނޫނު މިހާރު އޮތް ގޮތުން ރެޒިޑެންސް ވިސާ ދެނީ، އެންމެ ދެހާލަތަކަށެވެ. އެއީ ދިވެއްސަކާ ކައިވެނި ކުރާ ބިދޭސީންނަށާއި ބޮޑެތި އިންވެސްޓްމަންޓްތައް ކޮށްގެންއުޅޭ ބިދޭސީއަކަށް ދެވޭ ހުއްދައެއްގެ ދަށުންނެވެ. ނަމަވެސް އެ އިންވެސްޓުމަންޓުގެ އަދަދު ގާނޫނުގައި ބަޔާންކޮށްފައި ނުވެއެވެ.
ނަޝީދު ހުށަހެއްޅުވި އިސްލާހު ފާސްވެއްޖެ ނަމަ، ވަރަށް ފަސޭހައިން ބިދޭސީންނަށް ރާއްޖެއިންރެޒިޑެންޓް ވިސާ ލިބިގެންދާނެއެވެ. އަދި އެމަނިކުފާނު އެދިވަޑައިގެންނެވި އިސްލާހުގައި ގާނޫނުން ބޭރުގެ ވިޔަފާރިވެރިންނަށް އެއްލައްކަ ރުފިޔާއަށް ވުރެ ބޮޑު އިންވެސްޓްމަންޓަކަށް އެ އަދަދު ބަދަލު ކުރުމަކީ، ނިސްބަތުން ކުޑަ އަދަދެކެވެ.
މި މައްސަލައިގައި ނަޝީދަށް އެތައް ބައެއްގެ ފާޑުކިޔުމާއި ނުރުހުން އަންނަނީ އަމާޒުވަމުންނެވެ.
