ކޮންމެހެން ބޭނުން ވެގެން ނޫނީ އީދު ބަންދުގައި ރަށްރަށަށް ނުދިއުމަށް އިލްތިމާސް ކޮށްފި
ކޮންމެހެން ބޭނުން ވެގެން ނޫނީ އީދު ބަންދުގައި ރަށްރަށަށް ނުދިއުމަށް ޑރ. އަހުމަދު ޝަހީދު އިލްތިމާސްކޮށްފި އެވެ.
ހެލްތު އިމަޖެންސީ އޮޕަރޭޝަންސް ސެންޓަރު (އެޗްއީއޯސީ)ގައި ރޭ ބޭއްވި ނޫސްވެރިންގެ ބައްދަލުވުމުގައި ޑރ. ޝަހީދު ވިދާޅުވީ ރަށްރަށަށް ދާން އެދޭ މީހުންގެ އަދަދު ގިނަކަން ފާހަގަކުރެވޭ ކަމަށެވެ.
އޭނާ ވިދާޅުވީ ޒަރޫރީ ބޭނުމެއް ނެތް ނަމަ މާލެއިން ރަށްރަށަށް ދަތުރުނުކުރުން ވަރަށް މުހިންމު ކަމަށާއި އޭގެ ބޭނުމަކީ ރަށްރަށުގައި ކޮވިޑް-19 ފެތުރުނަނުދީ ހިފަހެެއްޓޭތޯ ބުރަ މަސައްކަތްތަކެއް ކުރަމުންދާތީ ކަމަށެވެ.
އެހެންވީމާ ވަކިވަކި ފަރުދުން ވެސް މިގޮތަށް ވިސްނަވަންވާނީ. ސީދާ ޒަރޫރީ ބޭނުމެއް ނެތިއްޔާ ރަށްރަށަށް ދަތުރު ނުކުރުން އެންމެ ރަނގަޅު ގޮތަކީ،" އޭނާ ވިދާޅުވިއެވެ.
އަދި އީދު ޗުއްޓީއަށް ރަށަށް ދިޔަ ނަމަވެސް 14 ދުވަހު ކަރަންޓީނުވާން ޖެހޭނެކަމަށާއި ކަރަންޓީނު ނިމުމުން ނޫން ގޮތަކަށް އަނބުރާ މާލެ ވެސް ނާދެވޭނެކަން ފާހަގަކުރެއްވި އެވެ.
