ރައްޔިތުންގެ މަޖިލީހުގެ އިދާރާގައި މެކްސިކަން ރެސްޓޯރެންޓެއް!
ރައްޔިތުންގެ މަޖިލީހުގެ ރައީސް މުހައްމަދު ނަޝީދު މަޖިލީހުގެ އިދާރާގައި މެކްސިކަން ރެސްޓޯރެންޓެއް އަޅުއްވަން ނިންމަވާފައިވާ ކަމަށް ކާށިދޫ ދާއިރާގެ މެމްބަރު އަބްދުﷲ ޖާބިރު ވިދާޅުވެއްޖެއެވެ.
ޖާބިރުއާ ހަވާލާދީ ދިވެހި ރައްޔިތުންގެ ޕާޓީ(ޑީއާރުޕީ)ން ކުރި ޓްވީޓެއްގައި ބުނީ ރައީސް ނަޝީދު މަޖިލީހުގެ އިމާރާތުގައި މެކްސިކަން ރެސްޓޯރެންޓެއް ހައްދަވައިދެއްވީތީ ޝުކުރު އަދާކުރާ ކަމަށެވެ.
ޖާބިރު ވިދާޅުވީ މީޑީއާތަކުން ވެސް މަޖިލީހުގެ ރައީސް ކުރިއަށް ގެންދަވާ ކަންކަން ބައްލަވާ ލެއްވުން މުހިންމު ކަމަށެވެ.
"މަޖްލީހުގެ ރައީސްގެ ގޮނޑީގައި ގިނަ ދުވަސް އިންނެވުން އެދި ދުއާ ދަންނަވަން." ޖާބިރު ވިދާޅުވިއެވެ.
Majlis ge Raees @MohamedNasheed Majlis imaaraathugai Mexican Restaurent eh hadhavaidhehveethee shukuru adhaa kuran. Media thakun ves majileehuge Raees kuriah gendhavaa kan kan ballavaa levvun muhimmu.Makifaanu Majlis Raees ge gondeega ginadhuvas innevun edi dua dhannavan - Jabir
— DRP (@drpmaldives) July 18, 2020
ރައްޔިތުންގެ މަޖިލީހުގެ ސޯޝިއަލް ކްލަބުގެ ދަށުން މަޖިލީހުގެ އިދާރާގައި ރެސްޓޯރެންޓަކާއި ޖިމެއް ހުޅުވަން ނިންމާފައިވާ ކަމަށް ރައީސް ނަޝީދު މި މަހުގެ އެއްވަނަ ދުވަހު ބޭއްވި ޖަލްސާގައި ވަނީ ވިދާޅުވެފައެވެ.
ނަޝީދު ވިދާޅުވީ މަޖިލީހުގެ ސޯޝިއަލް ކްލަބުގެ ދަށުން މަޖިލީހުގެ އާ އިމާރާތުގެ ޓެރަސްގައި ރެސްޓޯރެންޓެއް ގާއިމް ކުރެވޭނެ ކަމަށެވެ. އަދި ހަމަ އެ ކަލަބުގެ ދަށުން މަޖިލީހުގެ އާ އިމާރާތުގައި ޖިމެއްވެސް ގާއިމް ކުރެވޭނެ ކަމަށް ނަޝީދު ވިދާޅުވި އެވެ.
މަޖިލީހުގެ ސޯޝިއަލް ކްލަބުގައި ހިމެނެނީ މަޖިލީހުގެ މެމްބަރުންނާއި މުވައްޒަފުން ކަމަށްވެސް ނަޝީދު ވިދާޅުވި އެވެ.
