އަދީބުގެ ދައުވާތައް ބާތިލުކުރި ގާޒީ ސަސްޕެންޑު ކޮށްފި!
ކުރީގެ ނައިބު ރައީސް އަހުމަދު އަދީބުގެ ދައުވާތައް ބާތިލުކުރި ގާޒީ ދެ މަހަށް ސަސްޕެންޑު ކޮށްފިއެވެ.
އަދީބުގެ މައްޗަށް ދައުލަތުން ކޮށްފައިވާ ހަތް ދައުވާއެއް ބާތިލް ކޮށްފައިވަނީ ކްރިމިނަލް ކޯޓުގެ ގާޒީ އިސްމާއިލް ރަޝީދު އެވެ.
ޖުޑީޝަލް ސާވިސް ކޮމިޝަން (ޖޭއެސްސީ) އިން ނެރުނު ބަޔާނެއްގައި ބުނެފައިވަނީ، އެ ކޮމިޝަނުން ބަލަމުން އަންނަނީ ގާޒީ އިސްމާއީލް ރަޝީދު ފާޅުކަންބޮޑުގޮތެއްގައި ފަނޑިޔާރުންގެ ސުލޫކީ މިންގަނޑާ ކަނޑައެޅިގެން ޚިލާފަށް އަމަލުކުރި ކަމަށް ތުހުމަތު ކުރެވޭ މައްސަލަ ކަމަށެވެ.
މީގެއިތުރުން ޖޭއެސްސީން ބުނެފައިވަނީ ގާޒީ އިސްމާއީލް ރަޝީދު ސަސްޕެންޑުކުރީ އެ މައްސަލައިގެ ބާވަތަށާއި އެ މައްސަލައާ ގުޅިގެން ހުށަހެޅިފައިވާ ހެއްކަށާއި އެ މައްސަލަ ތަހުގީގު ކުރާއިރު އޭނާ ފަނޑިޔާރުކަމުގެ މަސައްކަތުގައި ދެމިހުރެއްޖެނަމަ، މައްސަލަ ތަހުގީގު ކުރުމަށް އެޅިދާނެ ހުރަހަށާއި ޝަރުއީ ދާއިރާގެ އިތުބާރު ނެގެހެއްޓުމުގެ އަސާސްގެ މައްޗަށް ބިނާކޮށް ކަމަށެވެ.
އެހެންކަމުން ޖުޑީޝަލް ސާރވިސް ކޮމިޝަންގެ ޤާނޫނުގެ 25ވަނަ މާއްދާގެ (ތ)އާއި (ލ)އާ ޙަވާލާދީ، ޤާޟީ އިސްމާޢީލް ރަޝީދު، ވަގުތީގޮތުން 2 މަސްދުވަހަށް ފަނޑިޔާރުކަމުގެ މަސައްކަތުން ދުރުކުރުމަށް މިއަދު ބޭއްވި ޖޭއެސްސީގެ ޖަލްސާއިން ވަނީ ނިންމާފައިކަމަށް އެބަޔާނުގައިވެއެވެ.
މިމައްސަލާގައި ޤާޒީ އިސްމާޢީލް ރަޝީދު، ފަނޑިޔާރުންގެ ސުލޫކީ މިންގަނޑާ ޚިލާފަށް ކުރެއްވިކަމަށް ތުހުމަތުކުރެވޭ އަމަލުތަކުގެ ތަފްސީލު މިމައްސަލަ ތަޙްޤީޤުކޮށް ނިމުމުން ޢާންމުކުރައްވާނެ ކަމަށްވެސް ޖޭއެސްސީން ވަނީ ހާމަކުރައްވާފައެވެ.
