އިމިގްރޭޝަން ގާނޫނަށް އިސްލާހު ހުށަހެޅުމުގެ ހަގީގަތް ހޯދަން ވެއްދި މައްސަލަ ބޭރުކޮށްލައިފި
އިމިގްރޭޝަން ގާނޫނަށް އިސްލާހު ގެންނަން ރައްޔިތުންގެ މަޖިލީހުގެ ރައީސް މުހައްމަދު ނަޝީދު ހުށަހެޅުއްވި ސަބަބު ހޯދަން ގޮވާލައި ރައްޔިތުންގެ މަޖިލީހަށް ވެއްދި ކުއްލި މައްސަލަ ބޭރުކޮށްލައިފިއެވެ.
ނޮޅިވަރަމް ދާއިރާގެ މެ،މްބަރު މުހައްމަދު ނަޝީދު އަބްދުﷲ (މޮސްޓާ) ހުށަހެޅުއްވި އެ ކުއްލި މައްސަލަ ތަޅުމަށް ބަލައިގަނެ ބަހުސަށް ހުޅުވާލަން ފެންނަ ކަމަށް ވޯޓު ދެއްވީ 16 މެންބަރުންނެވެ. ބަހުސަށް ހުޅުވާލަން ނުފެންނަ ކަމަށް 19 މެންބަރުން ވޯޓު ދެއްވި އެވެ. އެހެންކަމުން އެ މައްސަލައަށް ބަހުސް ކުރަން ފާހެއް ނުވި އެވެ.
މި މައްސަލަ ހުށަހަޅުއްވަމުން މޮސްޓާ ވިދާޅުވީ މަޖިލީހުގެ ރައީސް ނަޝީދު އެ ގާނޫނަށް ހުށަހެޅުއްވި މި އިސްލާހުގެ ހަގީގީ ބޭނުމަކީ ރާއްޖޭގައި އުޅެމުންދާ ބިދޭސީންގެ ތެރެއިން ބާރުގަދަ އަވަށްޓެރި ގައުމަކަށް ނިސްބަތްވާ 25،000 ބިދޭސީންނަށް ދާއިމީ ގޮތެއްގައި ރާއްޖޭގައި އުޅެވޭނެ ގޮތަށް މަގުފަހިކުރުން ކަމަށް މިކަމުގެ މައުލޫމާތު އެނގޭ ފަރާތަކުން މައުލޫމާތު އަރުވާފައިވާ ކަމަށެވެ.
އޭގެ ފަހުން ރާއްޖޭގައި އެ މީހުންގެ ދީނުގެ އަޅުކަންތައް ކުރެވޭނެ ފައްޅިތައް ފަދަ ތަންތަން އަޅާނެ ކަމަށް ވެސް މައުލޫމާތު ލިބޭ ކަމަށް މޮސްޓާ ވިދާޅުވި އެވެ. އެ ހުރިހާ މަސައްކަތެއް ކުރުމަށް ހަމަޖެހިފައި ވަނީ އިންސާނީ ހައްގުތަކުގެ ނަމުގައި ކަމަށް ވެސް މައުލޫމާތު ލިބޭ ކަމަށް މޮސްޓާ ވިދާޅުވި އެވެ.
އަދި މި ކަންކަމަކީރާއްޖޭގެ މިނިވަން ކަމާއި އިސްތިގުލާލާއި ގައުމީ ސަލާމަތަށް ނުރައްކާ ހުރި ކަމަކަށް ވާތީ މަޖިލީހުގެ ސަމާލުކަމަށް ގެންނަން މައްސަލަ ހުށަހެޅުއްވީ ކަމަށް މޮސްޓާ ވިދާޅުވިއެވެ.
