ރައްކާތެރިކަމުގެ ފިޔަވަޅުތަކާއެކު ކުޅިވަރު މުބާރާތްތައް ބާއްވަން މުޢިއްޒު ، އެޗްޕީއޭއަށް ގޮވާލައްވައިފި
ރައްކާތެރިކަމުގެ ފިޔަވަޅުތަކާއެކު ފުޓްބޯޅައާއި އެހެނިހެން ކުޅިވަރު މުބާރާތްތައް ބޭއްވުމުގެ ފުރުސަތު ދެއްވުމަށް ޑރ. މުޙައްމަދު މުޢިއްޒު ، ހެލްތު ޕްރޮޓެކްޝަން އެޖެންސީއަށް ގޮވާލައްވައިފިއެވެ.
އެ މަނިކުފާނު ކުރެއްވި ޓްވީޓެއްގައި ވިދާޅުވީ ފުޓްބޯޅައާއި އެހެނިހެން ކުޅިވަރު މުބާރާތްތަކުގައި އެތައް ހާސް ޒުވާނުންނެއް ޝާމިލްވާ ކަމަށާއި އެ ޒުވާނުން ތިބީ މާޔޫސް ވެފައި ކަމަށެވެ.
މުޢިއްޒު މިފަދައިން ގޮވާލެއްވިއިރު ރާއްޖޭގެ ފުޓްބޯޅަ ސީޒަން ވެސް ވަނީ މެދުކަނޑާލާފައެވެ. އެކަމާ ގުޅިގެން ކްލަބުތަކުގެ ކަންބޮޑުވުންތައް ވަނީ އިންތިހާއަށް ބޮޑު ވެފައެވެ. ސީޒަން ދިގުލައިގެން ދިޔުމާއެކު ކުލަބުތަކުގެ ޚަރަދުތައް އެތައް ގުނައަކުން އިތުރުވެ ، ގެއްލުން ބޮޑު ވަމުންދާތީ ކުޅުންތެރިން ވެސް ވަނީ ކޮވިޑް ވެކްސިން ޖަހާ ލީގު ފެށުމަށް އެދިފައެވެ. އަދި ކްލަބުތަކުން ވެސް ވަނީ އެކަމަށް އެދި ބަޔާން ނެރެފައެވެ. މީގެ އިތުރުން އެފްއޭއެމް އިން ވެސް ލީގު ފެށުމަށް މަސައްކަތް ކުރި ނަމަވެސް އެކަން ކާމިޔާބު ނުވެ އޮތީ އެޗްޕީއޭއިން ހުއްދަ ނުދިނުމުގެ ސަބަބުންނެވެ.
އެޗްޕީއޭއިން ހޮޓާ ރެސްޓޯރެންޓުން ޚިދުމަތްދޭ ގަޑިތައް އިތުރުކޮށް ރައްކާތެރިކަމުގެ ބައެއް ފިޔަވަޅުތަކަށް ލުއިތައް ދެމުން ދިޔަ ނަމަވެސް ، ކުޅިވަރުތަކަށް ޚާއްޞަކޮށް ދިވެހި ފުޓްބޯޅަ ލީގު ފެށުމަށް ހުއްދަ ނުދޭތީ ފުޓްބޯޅައިގެ ގިނަ ބަޔަކު ދަނީ އެކަމަށް ފާޑު ކިޔަމުންނެވެ.
