ކޮވިޑް-19: ނައިފަރުން އިތުރު މީހަކު ފައްސިވެ، ޅ.އަތޮޅު އެލާޓަށް!
ޅ.ނައިފަރުން އިތުރު މީހަކު ކޮވިޑް-19 އަށް ފައްސިވެ، އެއަތޮޅު އެލާޓަށް ލައިފިއެވެ.
"ދެން" އަށް މައުލޫމާތު ދެއްވަމުން ނައިފަރު ހޮަސްޕިޓަލުގެ މެނޭޖަރ ޖައުފަރު ޢަބްދުﷲ ވިދާޅުވީ ފައްސި ވެފައި ވަނީ ފެލިވަރުގައި މަސައްކަތް ކުރާ މުވައްޒަފެއް ކަމަށެވެ.
"ބަލިވެގެން އެމީހާ މިކޮޅުގައި އެޑްމިޓު ކޮށްފައި ވަނީ 21 ވަނަ ދުވަހު. ކޮވިޑަށް ޓެސްޓު ކުރަން ސާމްޕަލް ނެގީ އިއްޔެ، މިއަދު ފައްސިކަން އެނގިފައި ވަނީ. އެޕޭޝަންޓަކީ ފެލިވަރުގައި މަސައްކަތް ކުރާ މީހެއް." ޖައުފަރު ވިދާޅުވިއެވެ.
ޖައުފަރު ވިދާޅުވީ ފެލިވަރުގައި ހުން ރޯގައިގެ އަލާމާތްތައް އުޅޭތާ ދެ ހަފްތާ ވެއްޖެ ކަމަށާއި އެމުއްދަތުގެ ތެރޭގައި ނައިފަރާއި، ހިންނަވަރާއި، ކުރެންދޫ، އޮޅުވެލިފުށި، ރ.އަތޮޅު، ބ.އަތޮޅު އަދި ނ. އަތޮޅަށް ވެސް މީހުން ގޮސްފައިވާނެ ކަމަށެވެ.
"ފައްސިވީ މި ދެވަނަ ކޭސް އާ ގުޅިގެން އަޅުގަނޑު އިންނާނީ އެލާޓެއް ނެރެފައި. އެއީ ޅ.އޮޅުވެލިފުށި، ކުރެންދޫ، ހިންނަވަރު މި ތިން ރަށަށް އަންގާފައި ވާނެ މިވީ 14 ދުވަސް ތެރޭ ފެލިވަރަށް އައިސް ގޮސްފައިވާ ފަރާތްތަކުން، އެފަރާތްތަކުގެ ފުރިހަމަ މައުލޫމާތު އެރަށެއްގެ ސިއްޙީ ފެސިލިޓީތަކަށް އެންގުމަށް" ޖައުފަރު ވިދާޅުވިއެވެ.
މީގެ އިތުރުން ޖައުފަރު ވިދާޅުވީ، ނައިފަރުން ފައްސިވީ މި ކޭސްއަކީ ރ.އުނގޫފާރު ކްލަސްޓާއިން ފައްސިވީ ކޭސްއެއް ކަމަށް އަދި ދަންނަވަން ނޭނގޭ ކަމަށާއި ކޮންޓެކްޓް ޓްރޭސިންގެ މަސައްކަތް ކުރިއަށްދާ ކަމަށެވެ.
