އާދަމް ޝަރީފުގެ ރައްދު ރައީސް ނަޝީދަށް: ވަގު ސަރުކާރެއް ތަމްސީލު ކުރަން ވޯޓު ދޭންޖެހޭ ސަބަބެއް ނެތް!
މިއީ ވައްކަން ކުރާ ސަރުކާރެއް ކަމަށް ކުރީގެ ރައީސް އަދި ރައްޔިތުންގެ މަޖިލީހުގެ މިހާރުގެ ރައީސް މުޙައްމަދު ނަޝީދު ވިދާޅުވުމަކީ، އިދިކޮޅުން ދައްކާ ވާހަކަ އެމަނިކުފާނު ޤަބޫލު ކުރައްވާ ކަމުގެ ހެއްކެއްކަމަށް މަޑުއްވަރީ ދާއިރާގެ މެމްބަރު އާދަމް ޝަރީފު ޢުމަރު ވިދާޅުވެއްޖެއެވެ.
ކޮވިޑް-19 ގެ ހާލަތާ ގުޅިގެން ހާލު ދެރަވާ މީހުންނަށް ފަރުވާ ދިނުމަށް ރާއްޖެއަށް ވެންޓިލޭޓަރު ގެންނަން އުޅުމުގައި ކޮރަޕްޝަންގެ ޢަމަލު ހިންގާފައިވާ ކަމަށް ބެލެވޭކަމަށް ބުނެ އެންޓި ކޮރަޕްޝަން ކޮމިޝަން (އޭސީސީ) އިން ވަނީ މައްސަލަ ހުށަހަޅާފައެވެ.
ނަމަވެސް ހެއްކާއި ޤަރީނާ ނެތް ކަމަަށް ބުނެ ޕްރޮސެކިއުޓާ ޖެނެރަލްގެ އޮފީހުން ވަނީ އެމައްސަލަ ނުބެލޭނެ ކަމަށް ނިންމަވާފައެވެ. އެނިންމެވުން އަލުން ރިވިއު ކުރުމަށް އޭސީސީން ހުށަހެޅުމުން ވެސް ޕީޖީ އޮފީހުން ނިންމެވީ އެމައްސަލަ ނުބެލޭނެ ކަމަށެވެ.
ޕީޖީ އޮފީހުގެ އެ ނިންމެވުމާ ގުޅިގެން ރައީސް ނަޝީދު އިއްޔެ ކުރެއްވި ޓްވީޓެއްގައި ވިދާޅުވީ ވައްކަން ކުރާ ސަރުކާރަކާއެކު އެމްޑީޕީން އޮންނަން ރައްޔިތުން ނޭދޭނެ ކަމަށެވެ.
ރައީސް ނަޝީދުގެ އެވާހަކަފުޅަށް ރައްދު ދެއްވަމުން އާދަމް ޝަރީފު ވިދާޅުވީ މިއީ ވައްކަން ކުރާ ސަރުކާރެއް ކަމަށް ކުރީގެ ރައީސް އަދި ރައްޔިތުންގެ މަޖިލީހުގެ މިހާރުގެ ރައީސް މުޙައްމަދު ނަޝީދު ވިދާޅުވުމަކީ، އިދިކޮޅުން ދައްކާ ވާހަކަ އެމަނިކުފާނު ޤަބޫލުކުރައްވާ ކަމުގެ ހެއްކެއް ކަމަށެވެ.
"ރައީސް ނަޝީދުގެ މި އިއުތިރާފުން އެމްޑީޕީއަށް ވޯޓު އިތުރެއް ނުވާނެ. ވަގު ސަރުކާރެއް ތަމްސީލު ކުރަން ވޯޓު ދޭން ޖެހޭ ސަބަބެއް ނެތް" އާދަމް ޝަރީފު ވިދާޅުވިއެވެ.
އާދަމް ޝަރީފު މިހެން ވިދާޅުވީ، ކުރިއަށް އޮތް ލޯކަލް ކައުންސިލު އިންތިހާބަށް އިޝާރަތް ކުރައްވައެވެ. އެ އިންތިހާބު ވެރިކުރަން ކުރާ އެމްޑީޕީއަށް ކާމިޔާބު ކުރެއްވޭތޯ ރައީސް ނަޝީދު ގެންދަވަނީ ކެމްޕެއިން ވެސް ކުރައްވަމުންނެވެ.
ދުބާއީގެ ކުންފުންޏެއްކަމަށްވާ އެގްޒެކިއުޓާސް ޖެނެރަލް ޓްރޭޑިންއާ ހަވާލުކޮށްގެން 75 ވެންޓިލޭޓަރު ގެންނަން ހަވާލު ކުރިޔަސް މިހާތަނަށް ލިބިފައިވަނީ 15 ވެންޓިލޭޓަރެވެ. ވެންޓިލޭޓަރު ގެންނަން ދުބާއީގެ ކުންފުންޏަށް ވަނީ އެޑްވާންސްގެ ގޮތުގައި 30.91 މިލިއަން ރުފިޔާ ވެސް ދީފަ އެވެ.
ވެންޓިލޭޓަރުގެ ހިޔާނާތާ ގުޅިގެން ކުރެވެނު ތުހުމަތުތަކާ ގުޅިގެން ކުރިން ހެލްތު މިނިސްޓަރުކަމުގައި ހުންނެވި އަބްދުﷲ އަމީން ވަނީ މަގާމުން އިސްތިއުފާ ދެއްވައިފައެވެ.
