ކޮވިޑް-19: ނައިފަރުން އިތުރު 17 މީހަކު ފައްސިވެއްޖެ
ޅ. ނައިފަރުން އިތުރު 17 މީހަކު ކޮވިޑް-19އަށް ފައްސި ވެއްޖެއެވެ.
ނައިފަރު ކައުންސިލުގެ ނައިބު ރައީސް މުޙައްމަދު ޝާހިދު ޢަބްދުﷲ "ދެން"އަށް މައުލޫމާތު ދެއްވަމުން ވިދާޅުވީ، ނައިފަރުގައި މިއަދު އިތުރު 17 މީހަކު ކޮވިޑަށް ފައްސިވެފައިވާ ކަމަށާއި ޖުމްލަ 31 މީހަކު މިހާރު އެރަށުން ފައްސިވެފައިވާ ކަމަަށެވެ.
"މިއަދު އިތުރު 17 މީހުން ފައްސި ވެފައިވާއިރު ނައިފަރުން މި ބައްޔަށް ފައްސިވީ ޖުމްލަ އަދަދު މިވަނީ 31އަށް އަރައިފަ. އަދި 35 ގެ މިހާރު ވަނީ ކަރަންޓީނު ކުރެވިފައި" ޝާހިދު ވިދާޅުވިއެވެ.
ނައިފަރުން މިއަދު ފައްސިވީ 17 މީހުންނަކީ ވެސް އެ އަތޮޅު ފެލިވަތު ކްލަސްޓާއާއި ގުޅުންހުރި ކޭސްތަކެއް ކަމަށް ލަފާ ކުރެވޭ ކަމަށް ވެސް ޝާހިދު ވިދާޅުވި އެވެ.
ހެލްތު ޕްރޮޓެކްޝަން އޭޖެންސީ (އެޗްޕީއޭ) ގެ އެންމެ ފަހުގެ ސާވަލަންސް ޑޭޓާއިން ދައްކާގޮތުގައި ރާއްޖޭގައި މިހާރު 23،524 މީހުން ކޮވިޑް-19އަށް ފައްސި ވެފައިވެއެވެ. އަދި 20،723 މީހުން މި ބަލިން ފަސޭހަ ވެފައިވާކަމަށް ދައްކާފައިވާއިރު، ރާއްޖޭގައި މިބަލި ޖެހިގެން މިހާރު ނިޔާވެފައި ވަނީ 67 މީހުންނެވެ.
މާލެ ސަރަޙައްދަށްވުރެ އަތޮޅުތެރޭގައި މި ބަލި ފެތުރޭ މިންވަރު އިތުރު ވަމުންދާކަން އެޗްޕީއޭއިން ފާހަގަ ކޮށްފައިވެއެވެ.
