އަމިއްލަ ވިޔަފާރިކުރުމުގެ ދާއިރާއިން ތަޖުރިބާ ޙިއްސާކުރުމަށް ޕްރޮގްރާމެއް ފަށައިފި
ޒުވާނުންގެ މެދުގައި އަމިއްލަ ވިޔަފާރިކުރުމުގެ ދާއިރާއިން ތަޖުރިބާ އާއި ހުނަރު ބަދަލުކުރުމުގެ މަޤްޞަދުގައި ޕްރޮގްރާމެއް ފަށައިފިއެވެ.
މިނިސްޓްރީ އޮފް ހަޔަރ އެޑިއުކޭޝަނުން ފަށައިފައި ވަނީ ލައިވް ވެބިނާ ސީރީޒް އެކެވެ. މި ސީރީޒް އިފްތިތާހް ކޮށްދެއްވީ މިނިސްޓަރ އޮފް ހަޔަރ އެޑިއުކޭޝަން ޑރ.އިބްރާހީމް ހަސަންއެވެ.
މިވެބިނާ ފެށުމަށް ބޭއްވި ބައްދަލުވުމުގައި ވާހަކަފުޅު ދައްކަވަމުން މިނިސްޓަރ ވިދާޅުވީ މިސިލްސިލާ ވެބިނާ މެދުވެރިކޮށް ޒުވާނުންނަށް ގިނަގުނަ އައު މަޢުލޫމާތު ލިބި މިޕްލެޓްފޯމް މެދުވެރިވެ ތަޖުރިބާ ހިއްސާކޮށް، އެކަކު އަނެކެއްގެ ކިބައިން މަޢުލޫމާތު ލިބިގެންދާނެކަމަށް އުއްމީދު ކުރައްވާ ކަމަށެވެ.
އަދި މި ވެބިނާ ކުރިއަށް ގެންދަނީ 4 ސެޝަނަކަށް ބަހާލައިގެންނެވެ. މިވެބިނާ މެދުވެރިކޮށް ޒުވާން ވިޔަފާރިވެރިން އަދި އަމިއްލަ ފަރުދުންގެ މެދުގައި ވިޔަފާރިކުރުމާ ގުޅޭ މަޢުލޫމާތު ހިއްސާ ކުރާނެ ކަމަށް ހަޔަރ އެޑިއުކޭޝަން މިނިސްޓްރީން ވިދާޅުވެއެވެ.
މިނިސްޓްރީން ވިދާޅުވީ މި ސިލްސިލާ ވެބިނާ ވެގެންދާނީ އަމިއްލަ ވިޔަފާރި ފެށުމަށް ޝައުޤުވެރިވާ ޒުވާނުންނަށް ލިބޭ ރަނުގެ ފުރުސަތަކަށް ކަމަށެވެ.
