ޖޫރިމަނާގެ ސަބަބުން ޒުވާނުންގެ ހަޔާތުގައި ޖެހިފައިވާ 'ބުރެކި' ނައްޓުވައި ދޭން ޖެހޭ: ހަސަން ލަތީފް
ލައިސަންސް ނެތި އުޅަނދު ފަހަރު ދުއްވުމުގެ ސަބަބުން ކޮށްފައިވާ ޖޫރިމަނާގެ ސަބަބުން ޒުވާނުންގެ ހަޔާތުގައި ޖެހިފައިވާ "ބުރެކި" ނައްޓުވައިދޭން ޖެހޭ ކަމަށް ހެންވޭރު ހުޅަނގު ދާއިރާގެ މެންބަރު ހަސަން ލަތީފް ވިދާޅުވެއްޖެއެވެ.
ލައިސަންސް ނެތި ޖޫރިމަނާ ކޮށްފައިވާ ފަރާތްތަކުގެ ޖޫރިމަނާއަށް ލުޔެއް ހޯދައިދިނުމަށް ގޮވާލައި ހަސަން ލަތީފް މިއަދު މަޖިލީހަށް ހުށަހެޅުއްވި މައްސަލައިގައި ބުނެފައި ވަނީ ލައިސަންސް ލިބުނު ކަމުގައި ވިޔަސް ޓްރެފިކް ގަވާއިދުތަކާ ހިލާފުވެގެން ކުރެވޭ ޖޫރިމަނާ ނުދެއްކިގެން ލައިސަންސް ފުލުހުންގެ ބެލުމުގެ ދަށުގައި އޮވެ ޖޫރިމަނާ އިތުރުވުމުގެ ސަބަބުން ލައިސަންސް ނުނެގިފައިވާ އެތައް ފަރާތެއް ވެސް އެބަ ތިބިކަމަށާއި އެ ފަރާތްތަކަށް ހައްލެއް ހޯދައި ނުދެވި ގިނަ ދުވަސް ފާއިތު ވަމުންދާ ދިޔުމަކީ އޭގެ ސަބަބުން އެ ފަރާތްތަކަށް ގިނަގުނަ މާލީ ގެއްލުންތަކެއް ކުރިމަތިވަމުންދާ ކަމެއް ކަމަށެވެ.
މިއީ މި ރާއްޖޭގެ ބޮޑު އާބާދީއެއް ތަހައްމަލް ކުރަމުންދާ ބޮޑު މައްސަލައެއް ކަން ފާހަގަ ކުރައްވައި ހަސަން ލަތީފް ވިދާޅުވީ އެ ޒުވާނުންގެ ހަޔާތުގައި "ތަޅެއް" އެޅުވި "ބުރެކި" ޖެހި ހުއްޓިފައި ވަނީ މި ޖޫރިމަނާގެ ސަބަބުން ކަމަށެވެ. އަދި މިކަމަށް ލުޔެއް ހޯދައިދޭން ޖެހޭ ކަމަށް ވިދާޅުވިއެވެ.
ޖޫރިމަނާގެ ޢަދަދު ދިހަ ހާސް ރުފިޔާއަށްވުރެ އިތުރުވެފައިވާ ފަރާތްތަކުގެ ޖޫރިމަނާގެ ބަދަލުގައި، އެ މީހަކު މުޖުތަމަޢަށް ފައިދާ ކުރަނިވި ކަމެއް ނުވަތަ މަސައްކަތެއް ނުވަތަ ޚިދުމަތެއް ކުރުމަށް ނެރުމުގެ އަމުރަކަށް އެދި ޝަރީޢަތަށް ހުށަހެޅުމުގެ ބާރު މޯލްޑިވްސް އިންލަންޑް ރެވެނިއު އޮތޯރިޓީއަށް ލިބިގެންވާކަމަށް ހަސަން ލަތީފް ހުށަހެޅުއްވި މައްސަލައިގައި ވެއެވެ.
ޤަވާއިދުގައި ލަތީފް ހުށަހަޅުއްވާފައިވާ 6 ކަންތައް:
1- ކޮމިއުނިޓީ ސަރވިސްގައި ބައިވެރިވެވޭނެ ހާލަތްތަކާއި އެކަމުގައި ޢަމަލުކުރާނެ އުޞޫލުތަކާއި،
2- ކޮމިއުނިޓީ ސަރވިސްގެ ގޮތުގައި ކުރެވިދާނެ މަސައްކަތްތަކާއި، އެމަސައްކަތް ކުރެވިދާނެ ތަންތަން ކަނޑައެޅުމާއި،
3- އެމަސައްކަތުން ލިބޭ އުޖޫރައިން ޖޫރިމަނާ އަދާކުރުމުގެ ގޮތުން ފައިސާ އުނިކުރެވޭނޭ އުޞޫލު ބަޔާންކުރުމާއި،
4- ކޮމިއުނިޓީ ސަރވިސްގެ މަސައްކަތަށް ނުކުތުން ޝަރުޠުކުރެވުމާއެކު އެފަރާތްތަކަށް ލައިސަންސް ނެގުމަށް ހުރަހެއް ނޯންނާނެކަން ބަޔާން ކުރުމާއި،
5- ދައްކަންޖެހި ނުދައްކާވާ ޖޫރިމަނާ ބަހާލައިގެން ދެއްކޭނެ އުޞޫލު ބަޔާން ކުރުމާއި،
6- ޖޫރިމަނާ އެކުގައި މަޢާފްކުރެވޭނޭ ހާލަތްތައް ބަޔާން ކުރުން
ހަސަން ލަތީފް އިތުރަށް ވިދާޅުވީ އެއްގަމު އުޅަނދު ދުއްވުމުގެ ގާނޫނާ ހިލާފް ވެގެން ޖޫރިމަނާ ކޮށްފައިވާ މީހުންގެ ތަފާސްހިސާބަށް ބަލާއިރު 2019 ވަނަ އަހަރު 2366 މީހަކު ޖޫރިމަނާ ކޮށްފައިވާ ކަމަށާއި އަދި މިދިޔަ އަހަރު 2658 ފަރާތެއް ޖުރިމަނާ ކޮށްފައިވާ ކަމަށެވެ. މީގެ ތެރޭގައި 3300 އަށް ވުރެ ގިނަ ކުޑަ ކުދިން ހިމެނޭ ކަމަށް ވެސް އޭނާ ވިދާޅުވިއެވެ.
