ކަރަންޓީނުގައި ތިބޭ މީހުންނަށް ވޯޓު ލެވޭނީ އެންމެ ފަހުން
ކުރިއަށް އޮތް ލޯކަލް ކައުންސިލް އިންތިހާބުގައި ވޯޓުލާ ދުވަހު ކަރަންޓީނުގައި ތިބޭ މީހުންނަށް ވޯޓު ލާން ދެވޭނީ އެހެން މީހުން ވޯޓުލައި ނިމުމުން ކަމުގައި އިލެކްޝަންސް ކޮމިޝަންގެ ރައީސް އަހުމަދު ޝަރީފް ވިދާޅުވެއްޖެއެވެ.
"ރާއްޖެ ޓީވީ" އަށް ދެއްވި އިންޓަވިއުއެއްގައި ޝަރީފް ވިދާޅުވީ ކަރަންޓީނުގައި ތިބޭ މީހުންނާއި ކޮވިޑް-19 އަށް ފައްސި މީހުންނަށް ވޯޓު ލެވޭނެ ގޮތަށް ނިންމާފައިވާ ކަމަށާއި ނަމަވެސް އެމީހުން ވޯޓުލާން އަންނައިރު އަމަލު ކުރަން ޖެހޭ ވަކި އުސޫލެއް އާންމު ކޮށްފައި ނުވާނެ ކަމަށެވެ.
"ރަށެއްގައި ވެއްޖިއްޔާ ރަށެއްގައި ހުންނާނެތާ އެރަށެއްގައި ފޯކަލް ޕޮއިންޓްތަކެއް. އެމީހުންނަށް ކަރަންޓީނުގައި ހުންނަ މީހަކު ގުޅާފައި ބުނަން ޖެހޭނީ ވޯޓުލާން ދާން ބޭނުމޭ. އެހެންވިއްޔާ އެމީހުން ވޯޓުލާ މަރުކަޒަށް އަންގާނެ މިވެނި ގެއަކުން ތިން މީހުން ވޯޓުލާ މަރުކަޒަށް އެބަދެއޭ. އެމީހުންނަށް ވޯޓުލުމަށް ކަނޑައަޅާފައި އިންނާނެ ގަޑިއަކީ އާންމު ގޮތެއްގައި 5 ގެ ފަހުން ބާކީ އިންނަ ގަޑީގައި. އޭގެ މާނައަކީ އާންމު ރައްޔިތުން ވޯޓުލާ ގަޑިތަކުގައި ކަރަންޓީނުގައި ތިބި މީހުންނާއި ޕޮޒިޓިވް މީހުންނަށް ވޯޓުލާކަށް ނުދެވޭނޭ." ޝަރީފް ވިދާޅުވިއެވެ.
ހަމައެހެންމެ ވޯޓުލާ ދުވަހު ،ކަރަންޓީނުގައި އޮންނަ ރަށްތަކުގައި ވެސް ވޯޓުލުމުގެ ކަންކަން ކުރިޔަށްދާނެ ކަމަށާއި އެރަށްރަށަށް ވޯޓު ފޮށިތަކާއި ސެކިޔުރިޓީ އުރަ ފަދަ ތަކެތި ބޭލުމުން އެތަކެއްޗާ ހަވާލު ވާނީ އެރަށެއްގައި ތިބޭ އީސީގެ އޮފިޝަލުން ކަމަށް ޝަރީފް ވިދާޅުވިއެވެ.
ޝަރީފް އިތުރަށް ވިދާޅުވީ ވޯޓުލާ ހުރިހާ މަރުކަޒުތަކެއްގައި ވެސް އަމަލު ކުރަމުން ގެންދާނީ އެޗްޕީއޭގެ އުސޫލުތަކާ އެއްގޮތަށް ގައިދުރުކަމުގެ ފިޔަވަޅުތައް އަޅައިގެން ކަމަށެވެ.
ވޯޓުލުން ކުރިޔަށް ގެންދިޔުމަށް ހަމަޖައްސާފައި ވަނީ އެދުވަހުގެ ހެނދުނު 7އިން ހަވީރު 5 ޖަހަންދެނެވެ. އަދި ވޯޓު ނެގުން ބަންދުވާތާ 30 މިނެޓް ފަހުން ވޯޓު ގުނަ ފަށާނެއެވެ.
