އަމީތާބްގެ ފަރާތުން ބެލުންތެރިންނަށް "ގުޑްބައި"
ކޮވިޑް-19އިން ރައްކާތެރިވުމުގެ ގޮތުން ޖަހާ ވެކްސިންގެ ފުރަތަމަ ޑޯޒް ޖެހުމަށްފަހު، ބޮލީވުޑްގެ މެގާސްޓާ އަމީތާބް ބަޗަން މިހާރު ތައްޔާރުވަމުން ދަނީ ބެލުންތެރިންނަށް އޭނާގެ މުޅިން އައު ފިލްމެއް ގެނެސްދިނުމަށެވެ.
ޑްރާމާ ސީރީޒް އުފެއްދުމުން މަޝްހޫރުކަން ހޯދާފައިވާ އެކްތާ ކަޕޫރް ޕްރޮޑިއުސް ކުރާ "ގުޑްބައި" ފިލްމުގެ މަސައްކަތް ފަށާފައިވާކަން އަމީތާބު ވަނީ ހާމަ ކޮށްފައެވެ. އަދި މި ފިލްމަކީ ބެލުންތެރިންނަށް ވަރަށް ކަމުދާނެ ފިލްމެއް ކަމުގެ ޔަގީންކަން ވެސް އަމީތާބު ދީފައިވެއެވެ.
މި ފިލްމުގައި އަމީތާބާއެކު މަސައްކަތް ކުރަނީ ޓެލޫގޫ އެކްޓްރެސްއެއް ކަމަށްވާ ރަޝްމިކާ މަންޑަނާއެވެ.
"ގުޑްބައި" އަށް ޝޫޓްކުރަން އިއްޔެ ފަށާފައިވީ ނަމަވެސް، އަމީތާބުގެ ފުރަތަމަ މަންޒަރު ނަގާނީ އަންނަ އާދީއްތަ ދުވަހު ކަމަށް ރިޕޯޓުތަކުން ބުނެއެވެ.
މި ފިލްމު ޑައިރެކްޓު ކުރަނީ އެކްތާ އާއެކު ގިނަ މަސައްކަތްތަކެއް ކޮށްފައިވާ ވިކާސް ބޭލްއެވެ. އެ ދެ މީހުން ކުރިން ނެރުނު ފިލްމުތަކުގެ ތެރޭގައި "ލުޓޭރާ" އަދި "އުޅްތާ ޕަންޖާބް" ހިމެނެއެވެ. މި ދެ ފިލްމަކީ ވެސް ބެލުންތެރިންގެ ހޫނު ތަރުހީބެއް ލިބުނު ދެ ފިލްމުކަން ފާހަގަ ކުރެވެއެވެ.
