އަމީތާބު އަނެއްކާވެސް ބަލި، އޮޕަރޭޝަނަކަށް ތައްޔާރު ވަނީ
ބޮލީވުޑްގެ މެގާ ސްޓާ އަމީތާބް ބަޗަން ގެ ބަލި ހާލަތު ދަށްވުމަކީ، ދުނިޔޭގެ އެކި ކަންކޮޅުތަކުގައި އުޅޭ އޭނާގެ ބިލިއަނެއްހާ ފޭނުން ވެސް ވަރަށް ކަންބޮޑުވާ ކަމެކެވެ.
އަމީތާބުގެ ބަލި ހާލަތު އަނެއްކާ ވެސް ދަށް ވެއްޖެކަން މިއަދު އޭނާ ވަނީ ހާމަ ކޮށްފައެވެ.
އެގޮތުން އޭނާގެ އަމިއްލަ ބްލޮގްގައި ލިޔެފައި ވަނީ، ސިއްޙީ މައްސަލައެއް އަނެއްކާ ވެސް ކުރިމަތިވެއްޖެ ކަމަށާއި އެހެންކަމުން ވަރަށް އަވަހަށް އޮޕަރޭޝަނަކަށް ތައްޔާރުވަމުން އަންނަ ކަމަށެވެ.
ނަމަވެސް ދިމާވެގެން އުޅެނީ ކޮން ސިއްޙީ މައްސަލައެއް ކަމެއް، ނުވަތަ ކުރަނީ ކޮން އޮޕަރޭޝަނެއް ކަމެއް އަމީތާބު ހާމަ ކޮށްފައެއް ނުވެއެވެ.
އަމީތާބް ބަޗަން ވަނީ މިދިޔަ އަހަރު ކޮވިޑް-19 އަށް ފައްސިވެ، ނާނާވަތީ ހޮސްޕިޓަލުގައި އެޑްމިޓުކޮށް ފަރުވާ ހޯދާފައެވެ. އެބަލިން ރަނގަޅުވުމަށްފަހު، ދުވަސް ކޮޅަކު މަސައްކަތާ ދުރުގައި އަމީތާބް ހުއްޓެވެ.
ބޮލީވުޑްގެ އެކްޓާ އިމްރާން ހާޝްމީ އާއެކު އަމީތާބް ހަރަކާތްތެރި ވެފައިވާ ފިލްމު "ޗެހެރޭ" މިއަހަރުގެ އޭޕްރިލް މަހު ރިލީސް ކުރަން ހަމަޖެހިފައިވާއިރު، އޭނާ މިހާރު ހަރަކާތްތެރި ވަމުންދަނީ ރަކުލް ޕްރީތު ސިންގް އާއި އަޖޭ ދޭވްގަން އާއެކު އޭނާ ފެނިގެންދާނެ ފިލްމު "މޭ ޑޭ" ގައެވެ. އަމީތާބު ވަނީ ޝޫޓިންގެ ތެރޭގެ ބައެއް މަންޒަރުތައް އޭނާގެ ސޯޝަލް މީޑިއާ އެކައުންޓުތަކުގައި ހިއްސާ ވެސް ކޮށްފައެވެ.
