" އައިފޯނު11ގައި އިންނަ 'އައި' ގެ މާނަ އަކީ އިންޑިއާގައި އުފައްދާފައިވާ އެއްޗެއް"
އައިފޯނުގެ ނަމުގައި އިންނަ 'އައި' މާނަ އަކީ އިންޑިއާ ގައި 'އުފައްދާފައިވާ އެއްޗެއް' ކަމަށް އިންޑިއާގެ ނޫސްތަކުން ބުނެފިއެވެ.
އިންޑިއާ ނޫސްތަކުން މި ފަދައިން ބުނެފައިވަނި އައިފޯނު 11 ގެ މޮޑެލްގެ ފޯނު އިންޑިއާގައި އުފައްދަން ފެށުމާއި ގުޅިގެންނެވެ. އެގޮތުން އިންޑިއާގައި އައިފޯނު 11 އުފެއްދުމުގެ މަސައްކަތް ކުރަމުން އަންނަނީ ޗެންނާއި ގައި ހުންނަ ފޮކްސްކޮން ޕްލާންޓުންނެވެ.
މިއީ ފަހުގެ ނަން ހިނގާ އައިފޯނެއް އިންޑިއާގައި އުފައްދަން ފެށި ފުރަތަމަ ފަހަރެވެ.
ރިޕޯޓުތައް ބުނާ ގޮތުގައި ފިޔަވަހިތަކަކަށް ބަހާލައިގެން އައިފޯނު 11 އުފެއްދުމުގެ މަސައްކަތް އިންޑިއާ ކުރިއަށްދަމުން ދާއިރު އެޕަލް އިން އިންޑިއާގައި އުފައްދާ އައިފޯނު އެކްސްޕޯޓު ކުުރުމުގެ ވިސްނުމެއް ވެސް ދަނީ ގެންގުޅެމުންނެވެ. އަދި އެކަމުގެ ސަބަބުން ޗައިނާ އަށް ބަރޯސާވާ މިންވަރު ކުޑަވެގެންދާނެއެވެ.
އެޕަލް އިން އަންނަނީ 2020 ވަނަ އަހަރު ނެރުނު އައިފޯނު އެސްއީ ގެ މޮޑެލް ވެސް އިންޑިއާގައި އުފައްދަން ފެށުމަށް މަޝްވަރާ ކުރަމުންނެވެ. އެގޮތުން އައިފޯނު އެސްއީ އުފައްދާނީ ބެންގަލޫރުގައި ހުންނަ ވިސްޓްރަން ޕްލާންޓުގައެވެ.
