ޕީޕީއެމުން ވާދަކުރި މެންބަރުގެ ކެނޑިޑެސީ ބާތިލް ކުރުމުން ވޯޓަކާ ނުލައި އެމްޑީޕީގެ ކެނޑިޑޭޓް ހޮވިއްޖެ
ޕްރޮގްރެސިވް ޕާޓީ އޮފް މޯލްޑިވްސް ، ޕީޕީއެމުން ލޯކަލް ކައުންސިލް އިންތިޚާބުގައި ވާދަކުރި ކެނޑިޑޭޓެއްގެ ކެނޑިޑެސީ ބާތިލް ކުރުމުން ވޯޓަކާ ނުލައި ، މޯލްޑިވިއަން ޑިމޮކްރެޓިކް ޕާޓީ ، އެމްޑީޕީގެ ކެނޑިޑޭޓް ހޮވިއްޖެއެވެ.
ލޯކަލް ކައުންސިލް އިންތިޚާބުގައި ޕީޕީއެމްގެ ފަރާތުން ތ.ކަނޑޫދޫ ކައުންސިލްގެ ރައީސް ކަމަށް ވާދަކުރި ހަސަން މޫސާގެ ކެނޑިޑެސީ ބާތިލް ކޮށްފައި ވަނީ މިދިޔަ ހަފްތާގެ ތެރޭގައެވެ.
ހަސަން މޫސާގެ ކެނޑިޑެސީ ސުޕްރީމް ކޯޓުން ބާތިލް ކޮށްފައި ވަނީ، އޭނާ އިންތިޚާބަށް ކުރިމަތިލިއިރު ސާބިތު ދަރަންޏެއް އޮވެ، ހުކުމާ އެއްގޮތަށް ފައިސާ ނުދައްކާ އޮތުމުންނެވެ.
ލޯކަލް ކައުންސިލު އިންތިޚާބުގައި ވާދަ ކުރުމަށް ކުރިމަތިލާ ކެނޑިޑޭޓުން ކިބައިގައި ފުރިހަމަ ވާން ޖެހޭ ޝަރުޠުތައް ޙަސަން މޫސާގެ ކިބައިގައި ފުރިހަމަ ނުވާ ކަމަށް އިލެކްޝަންސް ކޮމިޝަނުން އެންމެ ފުރަތަމަ ކަނޑައެޅީ ޖަނަވަރީ މަހުގެ 13 ވަނަ ދުވަހުއެވެ.
އިލެކްޝަންސް ކޮމިޝަނުން ކުރި އިއުލާނެއްގައި ވަނީ ހަސަންގެ ކެނޑިޑެސީ ބާތިލް ކުރުމުން އެ ގޮނޑިއަށް ވާދަކުރި އެމްޑީޕީގެ ކެންޑިޑޭޓް އަހުމަދު ރީހާން އިންތިޚާބަކާ ނުލައި، ހޮވިފައިވާ ކަމަށެވެ.
ލޯކަލް ކައުންސިލް އިންތިހާބުގެ ވޯޓުލުން ބޭއްވުމަށް ހަމަޖެހިފައި ވަނީ އަންނަ އޭޕްރީލް މަހުގެ 10 ވަނަ ދުވަހެވެ.
