އެހާރާއި މިހާރުގެ ތަރިން "މިނިވަން ވަޔާ" ކުޅެލައިފި
މިއަދަކީ ރާއްޖޭގެ 55 މިނިވަން ދުވަހެއެވެ.
އާއްމުގޮތެއްގައި ކޮންމެ މުނާސަބަތަކާއި ގުޅިގެން ވެސް، ރާއްޖޭގެ ފިލްމީތަރިން ބެލުންތެރިންނަށް ވަރަށް ޚާއްސަ ހުށަހެޅުންތަކެއް ގެނެސްދެއެވެ.
އެގޮތުން މިފަހަރު މިނިވަން ދުވަހުގެ މުނާސަބަތުގައި ވަރަށް ޚާއްސަ ވީޑިއޯ ލަވައެއް ދިވެހި ފަންނާނުންގެ ފަރާތުން މިވަނީ ގެނެސްދީފައެވެ.
ގިނަ ތަރިންނާއެކު އުފައްދާފައިވާ "މިނިވަން ވަޔާ ކުޅެލާށެ ތާޒާ" ވީޑިއޯ ލަވައިގެ ޚާއްސަ ކަމަކީ، ދިވެހި ފިލްމު އިންޑަސްޓްރީގެ އެހާރާއި މިހާރުގެ ބައެއް ފަންނާނުން މިލަވައިގައި ފެނިފައިވުމެވެ. އެގޮތުން ޖުމްލަ 75 ތަރިން މިލަވައިން ފެނިގެންދެއެވެ.
މިލަވައަކީ ފެޝަން ޑިޒައިނަރ އަދި އެކްޓަރ ޖާދުﷲ އިސްމާއިލް ޑައިރެކްޓު ކޮށްފައިވާ ލަވައެކެވެ. އޭނާ ބުނެފައިވާ ގޮތުގައި މިލަވަ ކުރިން އުފައްދަން އޭނަ ޙިޔާލު ކުރީ ކޮވިޑް-19 އާއި ގުޅިިގެން 10 ފަންނާނުންނާއެކީގައެވެ.
"ލޮކްޑައުންގެ ދުވަސްވަރު ކަމުގެ ވީ ނަމަވެސް، މި ޕްރޮޖެކްޓްގެ މަސައްކަތް ކުރިއަށް ގެންދިޔައިރު، ޖުމްލަކޮށް ފިލްމީ ދާއިރާގައި މަސައްކަތް ކުރާ އަދި ކޮށްފައިވާ އެހާރާއި މިހާރުގެ ހުރިހާ ފިލްމީ ތަރިންނަށް އަޅުގަނޑު ގުޅައިގެން މި ލަވައިގެ މައިގަނޑު މަގްސަދު ތަފްސީލު ކޮށްދިނުމުން، ހީނުކުރާ އަދަދަކަށް ފަންނާނުން މި ފުރުސަތުގައި ބައިވެރިވި" އޮންލައިން ނޫހަކަށް ޖާދު ބުނެފައިވެއެވެ.
މިލަވަ ގިނަ ބަޔަކަށް ކަމުގޮސް، ކާމިޔާބު ޕްރޮޖެކްޓަކަށްވީ މީގައި އުޅޭ ފަންނާނުން ދިން އެއްބާރުލުމުގެ ސަބަބުންކަން ވެސް ޖާދު ވަނީ ފާހަގަ ކޮށްފައެވެ.
ޖާދު އުފައްދާފައިމިވާ ލަވައިން ފެންނަނީ 67 ފިލްމީ ތަރިންނާއި، 6 ލަވަކިޔުން ތެރިންނެވެ. މިއީ އަދި މިފަދައިން އެންމެ ގިނަ ފަންނާނުން އެއް ލަވައަކުން ފެނުނު ފުރަތަމަ ފަހަރެވެ.
