ވޯޓް ލާން އައީ ހުއްދަ ހޯދައިގެން ތޯ ނުބަލާނެ، ނަން އޮތް ނަމަ ވޯޓު ލެވޭނެ: އީސީ
ކުރިއަށް އޮތް ލޯކަލް ކައުންސިލު އިންތިހާބަށް ވޯޓް ލާން އަންނަ މީހާގެ ނަން ވޯޓާސް ރެޖިސްޓްރީގައި އޮވެއްޖެ ނަމަ ވޯޓު ލެވޭނެ ކަމަށް އިލެކްޝަންސް ކޮމިޝަންގެ ރައީސް އަޙުމަދު ޝަރީފް (އީސީ ޝަރީފް) ވިދާޅުވެއްޖެއެވެ.
ޝަރީފް މިއަދު ކުރި ޓްވީޓެއްގައި މި ފަދައިން ވިދާޅުވެފައި ވާއިރު، ރައްކާތެރިކަމާ އެކު ވޯޓު ލުމަށް ވެސް ވަނީ އިލްތިމާސް ކުރައްވާފައެވެ. އަދި ވޯޓު ލާން އައީ ހުއްދަ ހޯދައިގެން ތޯ ނުބަލާނެ ކަމަށް އެ މަނިކުފާނު ވިދާޅުވިއެވެ.
“ވޯޓް ލާ މަރުކަޒަށް ވޯޓު ލާން އަންނަ މީހާގެ ނަން ވޯޓާ ރެޖިސްޓްރީގައި އޮވެއްޖެ ނަމަ އޭނާ އަށް ވޯޓު ލެވޭނެ، ކިހިނެއްތޯ، ކޮންތާކުންތޯ އައީ ހުއްދަ ހޯދައިގެން ތޯ އައީ އީސީ އަކުން ނުބަލާނެ، ރައްކާތެރިކަމާ އެކު ވޯޓު ލައްވާ” ޝަރީފް ވިދާޅުވިއެވެ.
މި މަހުގެ 10 ވަނަ ދުވަހު ބޭއްވުމަށް ހަމަޖެހިފައިވާ ލޯކަލް ކައުންސިލް އިންތިހާބުގެ އެންމެ ފަހުގެ ތައްޔާރީތައް ވަމުން އީސީން މިހާރު ދަނީ ވަމުންނެވެ. އީސީން ވަނީ ލަންކާގައި 4 ފޮށި އަދި އިންޑިއާގައި އެއް ފޮށި ބަހައްޓަން ނިންމާފައެވެ. މި އިންތިޚާބުގައި މުޅިއަކު 735 ވޯޓު ފޮށި ބެހެއްޓުމަށް ހަމަޖެހިފައި ވެއެވެ. އަދި އެއްވެސް ވޯޓު ފޮއްޓަކަށް 600އަށް ވުރެ ގިނަ މީހުން ވޯޓު ނުލާނެ ކަމަށް އީސީގެ ރައީސް ވިދާޅުވެފައި ވެއެވެ.
