އެމްޑީޕީގެ ފަލްސަފާ އޮތީ "މަ މޮޅު" ކިޔުމަށް، ޕާޓީގެ އަމާޒަކީ ހުސް ވާހަކައިން ރައްޔިތުންނަށް އޮޅުވާލުން : ޖަމީލް
ހުސް ވާހަކައިން އަބަދު ރައްޔިތުންނަށް އޮޅުވާލުމަކީ އެމްޑީޕީގެ އަމާޒެއް ކަމަށާއި ޕާޓީގެ ފަލްސަފާ އޮތީ "މަ މޮޅު" ކިޔުމަށް ކަމަށް ކުރީގެ ނައިބު ރައީސް އަދި ގާނޫނީ ވަކީލު ޑރ.މުހައްމަދު ޖަމީލް އަހްމަދު ވިދާޅުވެއްޖެއެވެ.
ޖަމީލް މިހެން ވިދާޅުވެފައި ވަނީ ދެންމެ ކުރެއްވި ޓްވީޓެއްގައެވެ. ޖަމީލް ވިދާޅުވީ ޤަޢުމީ ތަރައްޤީގެ ވިސްނުން ސާބިތުކޮށްދިނީ ރައީސް ޔާމީން އާއި ޕީޕީއެމްއިން ކަމަށެވެ.
ޖަމީލް މިހެން ވިދާޅުވެފައި ވަނީ ރާއްޖޭގެ ވެރިކަމާއި، ރައްޔިތުންގެ މަޖިލިސް އެމްޑީޕީއަށް ދީގެން މާބޮޑު ނަތީޖާއެއް ނުފެނުނު ނަމަވެސް، ކައުންސިލްތަކުގެ މެޖޯރިޓީ އެމްޑީޕީއަށް ދީފިނަމަ ތަފާތު ފެންނާނެ ކަމަށް އެމްޑީޕީގެ ރައީސް މުޙައްމަދު ނަޝީދު ވިދާޅުވުމާ ގުޅިގެންނެވެ.
ރައީސް ނަޝީދު ވިދާޅުވީ، ލާމަރުކަޒީ ނިޒާމެއް އެކުލަވާލާ އަމިއްލަ ފައި މައްޗަށް ތެދުވެވޭނެ ފުރުޞަތު އެޕާޓީން ފަހި ކޮށްދޭނެ ކަމަށެވެ. އަދި ސަރުކާރެއް މެދުވެރިކޮށް ކަމެއް ކުރުމަށް ވުރެ ކައުންސިލެއް މެދުވެރިކޮށް އެކަމެއް ކުރުން މާ ފަސޭހަވާނެ ކަމަށް ރައީސް ނަޝީދު ވިދާޅުވިއެވެ.
އަންނަ ހޮނިހިރު ދުވަހު އޮންނަ ކައުންސިލް އިންތިޚާބަށް އެމްޑީޕީއާއި ޕީޕީއެމް އިން ދަނީ ކެމްޕެއިން ކުރަމުންނެވެ. މި އިންތިހާބުގައި ވާދަ ކުރަނީ 3،934 ކެންޑިޑޭޓުންނެވެ. އެއީ ކައުންސިލަރު ކަމަށް ވާދަކުރާ 2،264 މީހަކާއި އަންހެނުންގެ ކޮމެޓީތަކަށް ވާދަކުރާ 1،670 މީހެކެވެ.
މި ފަހަރުގެ އިންތިހާބުގައި 273،128 މީހުންނަށް ވޯޓްލުމުގެ ހައްގު ލިބިގެން ވެއެވެ. އޭގެ ތެރެއިން 5،134 މީހުންނަކީ އިންތިހާބު މި އަހަރަށް ފަސް ކުރުމުން، އެ މުއްދަތުގެ ތެރޭގައި 18 އަހަރު ފުރުނު މީހުންނެވެ.
